Dalan Ba Aniversáriu Daruak ! SAPNews Audiénsia Ho Vise PM Assanami
SAPNewsTL, Dili : Relasiona ho aniversáriu Mídia ba daruak ne’ebe sei akontese iha loron 26 fulan Fevereiru tinan ne’e, Estrutura Mídia Nasional Sa’ani Assamana Prazer News Timor-Leste (SAPNewsTL) halo audiensia ho Vise Primeiru Ministru Mariano Assanami Sabino Lopes, Sexta feira foin lailais ne’e iha Palasiu Guvernu Dili.
Objetivu husi Audiensia ne’e, Estrutura mídia konvida direita Vise Primeiru Ministru, Ministru Koordenador Asuntu Sosiais, Ministru Dezenvolvimentu Rural no Habitasaun Komunitária (VPM-MKAS-MDRHK) Mariano Assanami Sabino Lopes hodi halo palestra no partisipa iha selebrasaun anivesáriu SAPNews ba daruak.
Iha biban ne’e, Vise Primeiru Ministru Mariano Assanami Sabino apresia ba komitmentu foinsa’e sira nian iha SAPNews hodi halo atividade kobertura sira iha Timor-Leste.
“Ha’u Apresia ba imi hotu iha SAPNews, imi kontinua la’o ba oin, apresia ba komitmentu ne’e tanba imi bele hasoru dejafiu boot no asume responsabilidade hodi halo atividade jornalistika iha Timor Leste”. Tenik Vise PM Mariano Assanami Sabino durante sorumutu iha Gabinete Vise PM, Palasiu Guvernu, 02/02/2024.
Vise Primeiru Ministru Mariano Assanami Sabino afirma nia sei ba partisipa iha selebrasaun aniversáriu refere.
“Kona ba konvite ne’e, ha’u sei ba partisipa, imi kordena ho gabinete para tau iha ajenda”. nia afirma
Antes ne’e Mídia SAPNews mos hala’o ona audiensia ho Presidente Konsellu Imprensa Otelio Ote, iha ne’ebe nia afirma sei ba hola parte iha selebrasaun aniversáriu ba daruak hanesan media nasional ida iha Timor-Leste.
Mídia SAPNewsTL hari’i husi estudante universitáriu sora, formandu profisional jornalizmu no estudante sekundária sira iha loron 26 Fulan Fevereiru 2022, iha ne’ebe hamrik ho vizaun atu atinji sosiedade Timor Leste ida informativu, inspirativu, konstrutivu no edukativu ba hametin no haburas konstrusaun estadu de direitu no demokrátiku. Portantu, tinan ne’e mídia refere sei selebra ninia aniversáriu ba daruak iha Timor Leste.
Jornalista : Ermelinda Soares