KJI Realiza Semináriu Komemora 28 Novembru, Lere-Assa : Joven Mak Promotor Ba Paz

SAPNewsTL, Dili : Klibur Juventude Iliomar Realiza semináriu Nasionál komemora loron 28 Novembru ba dala 47 iha Kampus Universidade da Paz, Tuir Kordenador João Caetano haktuir Objetivu husi semináriu ne’e atu komemora 28 Novembru, oinsa bele hametin espiritu nasionalizmu no patriotizmu joven sira nian liliu bele rona no hatene istoria luta Timor Leste nian

“Objetivu husi Semináriu ne’e atu fanun joven sira buka hatene istória Timor nian hodi kontribui ba paz no estabilidade iha Timor Leste inklui hametin espiritu patriotizmu no nasionlizmu, nune’eita hotu bele hamutuk luta kontinua ba desenvolvimentu Nasional”. Tenik Kordenador Klibur Juventude Iliomar João Caetano iha Salaun UNPAZ, 26/11/2022

Iha Palestra Orador Primeiru Jeneral Lere Anan Timur hateten iha loron 28 Fulan Novembru 1975, Timor Leste Deklara no proklama unilateralmente katak Timor Leste ukun rasik an, ema iha Áfrika sira mak rekunhese, maibe nasaun sira seluk la rekunhese

“Loron 28 Novembru iha momentu ne’eba, situasaun ne’ebe difisil tebes,ita proklama unilateralmente tanba momentu ne’ee Indonézia atu tama Timor, entaun ita deklara ita nia an katak Timor iha na’in, tanba ita mak nain ita lakoi atu fo fali ba ema seluk hodi sai fali nain, ne’e mak sentidu husi proklamasaun independensia 28 novembru 1975”. Dehan Jeneral Lere Anan Timur iha nia Palestra ba Partisipante iha iha Salaun UNPAZ

Entretantu, Jeneral ne’e mos husu ba Joven Timor oan sira tenki sai promotor ba paz no estabilidade, halakon krime no violensia kontribui ba desenvolvimentu nasional, tanba uluk Timor lakohi injustisa, krime no violasaun sira mak heroi no FALINTIL sira luta fakar ran no ruin naklekar hodi defende ukun rasik an

Iha fatin hanesan, Eng. Mariano Assanami Sabino hateten Espiritu 28 Novembru fo mensagem ba Timor oan hotu hamutuk dignifika heroi sira hotu, fo kontinuidade ba luta ne’ebe uluk sira halo hodi restaura ukun rasik an, joven agora tenki sai joven determinante, estuda makaas no adapta an ba teknoljia

“Espiritu 28 Novembru fo ba imi tenki Orgullu nu’udar Timor Oan, estuda didiak katak aprende barak, lee barak, halo peskija no fo solusaun ba problema hotu ne’e povu hasoru, ida seluk fali, imi tenki adapta an ba teknolojia dijital, kaer telephone aproveita estuda siensia husi rai seluk, akompanha desenvolvimentu mundial, aprende ka estuda iha Timor, hanesan mos aprende iha Oxford, Austrália, Amérika, Portugal no rai sira seluk”. Sublinha Mariano Assanami Sabino iha nia diskursu

Assanami Fundamenta, Joven Timor labele lakon esperansa, rai Timor sei diak ba oin no sei la monu, joven tenki buka hatene valores resistensia no komunga valores hirak ne’e hodi aprende, servi no kontribui ba rai ne’e nia desenvolvimentu

Enkuantu, Seminariu nasional ne’e partisipa husi membru Klibur Juventude Iliomar, Universitariu sira husi UNPAZ, UNTL, DIT, IOB, ICS, UNITAL no organizasaun sira seluk tan.

Jornalista : Ferderita Alita Miranda & Marzinha Patrisia Hornay

Editor        : Ekipa Editorial