Kliente Sira Hahú Simu Pulsa Ahi $ 5, Laran Moras Nakfilak Ba Agradese EDTL, E.P

SAPNewsTL, Lautem : Relasiona ho difikuldade ne’ebé EDTL, E.P enfrenta hahú iha loron segunda-feira (01/05/2023), iha ne’ebé kliente sira tenki ba forma naruk no hein kleur, tanba sistema EDTL falla hodi difikulta kliente Sira atu hola pulsa ahi durante loron tolu, nune’e EDTL, E.P liu husi enkontru extra-ordinariu deside subsidia kliente hotu ho pulsa Eletrisidade $5.00, nune’e daudaun ne’e kliente sira iha territoriu nasional hahu simu ona pulsa eletrisidade

Objetivu husi rekompensasaun ne’e hodi bele hamenus frekuensia sosa pulsa iha sentru tranzasaun sira no fo espasu ba tekniku sira hodi halo manutensaun ba sistema ne’ebe hasoru problema

Prezidente Konsellu Administrasaun Eletrisidade de Timor Leste, Empresa Pública (EDTL, E.P) liu-husi enkontru extra ordinaria Konsellu Administrasaun EDTL, E.P, deside subsidiu pulsa eletrisidade ho montante $ 5. 00 ba kliente domestiku iha territóriu Timor-Leste.

“EDTL, E.P Liu husi reuniaun Extra Ordinário deside fo subsídiu pulsa eletrisidade ba Kliente Hotu Iha Territóriu Nasionàl tanba Kauza husi Sistema transaksaun Pulsa Ahi ne’ebé hasoru problema”, Tenik Presidente Konsellu Administrasaun EDTL,E P Dr. Paulo da Silva Liu husi Komunikadu Imprensa iha Knaar Fatin Kaikoli, Dili,02/05/2023

Iha sorin seluk, Sidadaun Josefina Savio sente kontente no agradese ba EDTL, E.P tanba bele rekunese fallansu hodi rekompensa fali ho pulsa ahi $5.00 dolar ba kada kliente

“Ha’u sente kontente tebes no agradese ba EDTL, E.P tanba bele rekunese fallansu no fo pulsa ahi $5 dolar ba kada kontador sira iha Timor Laran tomak”. Dehan Josefina Savio ba SAPNewsTL iha Postu Administrativu de Luro, Munisipiu Lautem, Kinta-Feira, 04/05/2023

Josefina mos husu ba EDTL,E.P hodi hadia sistema ne’ebe sempre mosu problema hodi difikulta komunidade sira ba asesu pulsa eletrisidade, tanba dala barak ona komunidade sira tenki ba forma iha Sentru Transaksaun Sira hodi Sosa pulsa eletrisidade, liu husi forma naruk, hein Kleur no halo kliente sira tenki laran moras no hirus

“Ha’u husu ba EDTL, E.P atu servisu didiak hodi hadia sistema ne’ebe sempre hasoru problema hodi difikulta komunidade sira tenki ba hein kleur, forma naruk no laran moras foin sosa pulsa eletrisidade, maibe ohin ami agradese tanba bele simu pulsa husi EDTL,e.p”. nia husu

Portantu, EDTL,E.P fo sai ona data no fasilita Pulsa ne’e Liu husi kontaktu no envia númeru kontador husi kada Kliente iha território Nasional, enkuantu daudaun ne’e kliente barak mak simu ona pulsa ahi ba sira nia kontador, rekompesasaun ne’e mos nu’dar dalan ida hamenus numeru sosa pulsa hodi fo espasu ba tekniku sira hodi halo normalizasaun no manutensaun

Jornalista: Luis Pailofo