PD Kongratula Jornalista Sira, Assanami : Lider Polítiku Tenki Simu Krítika, Wainhira Ko’alia Sala

SAPNewsTL Dili : Relasiona ho loron mundial ba liberdade imprensa, Presidente Partidu Demokrátiku (PD) Mariano Assanami Sabino Lopes konsidera Média mak klamar ba demokrasia no jornalista sira kaer papel ne’ebe fundamentu ba ezisténsia personalidade ida-idak nian

“Média mak klamar ba demokrasia, demokrasia iha elementu tolu importante maka debate rasiosiniu ho ideia no hanoin ne’ebe transforma hanoin hotu, Média tenki livre hodi tau ema nia hanoin no ideia sira, nune’e ema bele diskute, no labele iha monopolia ba lialos, média tenki transmite lialos ba sosiedade no hamoris demokrasia”. Tenik Presidente PD Mariano Assanami Sabino ba Jornalista sira, iha Sala Reuniaun Bankada PD, Dili, 03/05/2023

Presidente PD ne’e konsidera Média mak matan, tilun, ibun ba sosieade Timor Leste, parabens ba Jornalista sira hotu

“Parabens Ba Jornalista sira hotu no ema hotu ne’ebe servisu ba Mídia, maske saláriu ne’ebe kiik, susar tebes, laiha fatin ba promosaun, maibe to’o tempu ida sei to’o iha ne’eba, hakruuk parabens ba imi, imi mak matan, tilun, ibun, imi hotu aswa’in hodi loke dalan ba involvimentu povu iha infomasaun sira hotu”. Hatete Assanami

Assanami hatutan, wainhira sai ona figura públiku, kuandu hamriik sala ka ko’alia lalos, ema krítika, lider tenki prontu hodi simu krítiku, média tenki kontinua transmite lialos ba komunidade

“Liberdade imprensa ne’e fundamental, wainhira halo servisu ba públiku, figura públiku, o nia privasidade limite, tanba ne’e mak kuandu hamriik sala ka ko’alia lalos, ema krítika, ita tenki simu krítiku, média tenki kontinua transmite lialos ba komunidade”.hakotu Assanami

Jornalista : Ermelinda Soares