Klube Portu Taibesi Rejistu Jogador Nain-27 Iha LFTL

SAPNewsTL, Dili : Klube Porto Taibesi rejistu ona jogador hamutuk nain -27 inklui jogador estranjeiru nain haat iha orgaun Liga Futebol Timor-Leste (LFTL) hodi kompete Liga Timorense epoka 2023.

“Ohin ami mai rejistu ona jogador hamutuk nain-27 iha orgaun LFTL, husi total jogador ne’e, ami iha jogador estranjeiru nain haat husi indonesia ne’ebe loron hirak liu ba ami dehan tolu maibe konsege hetan tan ida, jogador sira ne’e ami prepara atu kompete iha divizaun dahuluk Liga Timorense epoka 2023”, dehan manajer klube Charles Guterres ba jornalista sira iha edifísiu LFTL  Estadium Munisipal Dili sesta (3/02/2023).

Manajer hatutan, jogador estranjeiru nain haat ne’e sei joga iha pozisaun avasadu ho mediu ne’ebe antes seidauk joga dala ida iha Liga Timorense epoka hirak liu ba, jogador estranjeiru sira ne’e antes joga iha Liga 2 Indonesia maibe tanba agora paradu hela entaun klube akompaña ida ne’e foti oportunidade hodi kontratu sira mai reforsa ekipa kompete Liga Timorense epoka ne’e no sira sei to’o iha Timor-Leste semana oin.

Charles informa, jogador nain-27 ne’e kompostu barak liu mai husi jogador sira ne’e iha divizaun daruak iha 2021 lori klube Porto Taibesi promovidu mai divizaun dahuluk Liga Timorense epoka ne’e hamutuk ho jogador ne’ebe antes ne’e joga iha klube sira seluk kompete iha divizaun dahuluk nain lima inklui jogador estranjeiru nain haat.

Nia afirma, jogador sira ne’e klube Portu Taibesi nia esperansa  otimista sei mantein nafatin iha divizaun dahuluk Liga Timorense no karik sorte iha sira mos bele sai kampiaun ba Liga Timorense epoka ne’e tanba lahatene buat hotu sei bele akontese.

Reportajen: Augusto dos Santos