Lada’uk Iha Serteza Kona-Ba Orsamentu, LFTL Seida’uk Bele Submete Ba SEJD
SAPNewsTL,Dili: Orgaun Liga Futebol Timor Leste (LFTL) seida’uk bele submete proposta ba Liga Futebol Timor Leste époka 2022 tanba finansial suportasaun ne’ebé Federasaun Futebol Timor Leste (FFTL) promete ba Klube sira seida’uk serteza maski proposta preparadu ona.
“Ami seida’uk submete ba SEJD tanba ami seida’uk hetan serteza husi FFTL ba suportasaun finanseiru ne’ebé federasaun promete ba klube sira hira, ba klube iha divizaun dahuluk no daruak ba liga futebol Timor Leste epoka 2022-2023 seida’uk serteza maski proposta preparadu tiha ona”. Dehan Direktor Finansa LFTL Caetano Cárceres Correia ba jornalista sira iha Estadium Munisipal Dili, Kinta-Feira,25/08/2022.
Direktor Finansas ne’e aumenta, seida’uk iha klube ida halo rejistrasaun maski sira loke rejistrasaun dala rua tanba finansial suportasaun ba klube sira seidauk serteza.
“Razaun ida seluk mak ami loke tiha ona rejistrasaun ba janela transferénsia ba jogador sira maibé seida’uk iha klube ida mai rejistu, entaun ami konfirma klube sira la mai halo rejistrasaun tanba klube sira seida’uk hetan lolos serteza ba suportasaun finanseiru husi FFTL maibé sira prepara ona programa no kalendariu jogu ba epoka 2022 hodi hein suportasaun finanseiru ba klube serteza tanba ami lakohi halo terus ita nia klube sira”. Tenik Direktor
Nia hatutan, ami seidauk submete prospota ba SEJD maibe orgaun SEJD no FFTL promete ona atu tau orsamentu hodi hala’o liga epoka ne’e maibe sira hein hela orgaun LFTL tau hira
“Ami seida’uk submete prospota maibé SEJD promete ona atu apoiu ba liga futebol Timor Leste epoka 2022 ho orsamentu montante 200,000 USD ba operasional no subsidiu ba klube sira no FFTL anunsiu ona fo apoiu 200,000 mos entaun hamutuk 400,000 USD ne’ebé sira husu parte ami tau hira, ne’ebé parte ami nian ne’e implementador ba liga futebol Timor Leste orgaun organizador no regulador mak FFTL ne’ebé federasaun tur hamutuk ho ami diskute oinsá atu buka apoiu husi kompania ka organizasaun sira atu sai patrosinador ba epoka 2022”. Nia subliña
Direktor ne’e fundamenta, seida’uk iha patrosinador ne’ebé iha atu fo suporta maibé sira nafatin esforsu atu liga epoka ne’e bele hetan apoiu husi patrosinador.
“Klaru katak parte LFTL mos iha dever buka patrosinador, ne’ebé sira komitmentu buka ona patrosinador sira hodi hatama proposta ba kompania ka organizasaun sira maibé to’o agora seida’uk iha kompania ida ne’ebé hakarak sai patrosinador hodi fo apoiu ba liga futebol Timor Leste epoka ne’e maibé sira sei esforsu nafatin buka patrosinador sira hodi fo apoiu ba liga tinan ne’e, tan ne’e sira seida’uk responde ezizensia husi SEJD no FFTL katak parte LFTL tau orsamentu hira ba liga epoka 2022-2023. Nia hakotu.
Jornalista: Augusto dos Santos
Editor:Ekipa Editorial
