Lansa Website MDRHC ! VPM Assanami Husu Ministériu Hotu Tenki Tenki Iha Website
Imajem : Vise Primeiro Ministro Asuntu Sosiais, no MDRHC Mariano Assanami Sabino iha Salaun CNE, 03/10/2025
SAPNewsTL, Díli : Governu liu husi Vice Primeiru Ministru (VPM) Mariano Assanami Sabino ofisialmente lansa Website Ministériu Dezenvolvimentu Rurál, Habitação no Komunitária (MDRHC), atu reforsa servisu ministeriu nian ho efisiente no efikáz.
Tuir VPM Mariano Assanami Sabino hateten, Timor-Leste nu’udar estadu direitu demokratiku tenke forte liuhusi sistema dijitalizasaun, ne’ebé mak sustenta governasaun transparante no eficaz ligadu ho servisu sira.
“Ita tenke forte ho sistema katak ita tenke ho dijitalizasaun. Ministeriu ohin lansa hein katak ministeriu seluk-seluk iha governasaun mos tenke halo hanesan ne’e, ita labele ko’alia de’it ho vontade ka deklarasaun politika, maibé presiza sistema ida ne’ebé bele detekta klaru ita-nia servisu sira,”Dehan VPM Assanami Sabino iha salaun CNE, Sexta-feira, (03/10/2025)
Assanami hatutan katak, dijitalizasaun importante tebes ba transparénsia no prevene influensia politikál ka interese individu, nune’e website ida ne’e bele halo monitorizasaun ba servisu sira hotu.
“Sistema foun ne’e atu fasilita monitorizasaun no avaliasaun servisu sira iha governu. “Iha inspesaun no auditor mak sei haree prosesu hotu, la’os politikamente, maibé liuhusi sistema ida ne’ebé transparante no justu ba ita nia servisu”.
Iha fatin hanesan, Diretor Jeral Transformasaun Dijital Joni Mendonça fundamenta, website sei sai kanal ofisiál partilha informasaun ministeriu nian ba publiku atu asesu informasaun ne’ebe ministeriu hala’o iha sentral.
“Objetivu prinsipal lansamentu website ida ne’e mak atu partilha informasaun ofisiál ministeriu nian, liuhusi plataforma dijital ida de’it, entaun lansamentu website mak atu partilha informasaun liu-liu ativdade ministeriu iha terrenu, tantu iha nasional no internasionál, ida ne’e tanba ita tama ona ba era dijitalizasaun,” Tenik nia.
Nia aumenta tan katak website ofisiál ne’e sei sai kanal transparênsia ba publikasaun ezekusaun orsamentu tinan-tinan iha MDRHC.
“Aleinde website, ministeriu mos kria aplikasaun seluk hodi kontrola atividade iha aldeia sira, hanesan revitalizasaun komunitária no abitasaun komunitária,”
Diretor Joni aprofunda gabinete transformasaun dijital iha planu atu kria merkadu dijital hodi fasilita grupu produtivu iha área rurál atu hatama produtu sira ba merkadu nasional.
“Ita-nia komunidade iha área rurál difisil tebes atu lori sira-nia produtu tama iha merkadu nasional. Tanba ida ne’e, ita tenke dezenvolve merkadu dijital atu sira bele kompete ho merkadu nasional liu-liu iha preparasaun atu tama ASEAN,” Nia hakotu.