Laran Haksolok, Kristaun Luro Fo Agradese Ba Bispu Dioseze Baukau

SAPNewsTL, Lautém: Iha Âmbitu Selebrasaun Aniversáriu Parokia Nossa Senhora Ranha dos Apóstolos de Luro ba dala VI, Bispu Dioseze Baukau Dom Leandro Maria Alves fo Krisma ba sarani atus lima hatnulu resin rua (542)

Iha Omilia Bispu Dom Leandro Maria Alves parabeniza sarani Parokia Nossa Senhora Ranha dos Apóstolos de Luro ne’ebe halo tinan Neen no simu sakramentu krisma

Dom Leandro Maria husu sarani sira labele falta iha misa kada domingu tanba fiar ne’e tenki konkretiza liu husi hahalok sira

“Parabéns ba imi hotu, Sarani Luro ohin selebra padrueira Nossa Senhora Ranha dos Apóstolos nia loron no orseik simu sakramentu krisma, imi tenki badinas ba misa, fiar ne’e tenki selebra liu husi Misa no rona Maromak Futar Liafuan hodi konkretiza”. Tenik Bispu Dioseze Baukau Dom Leandro Maria Alves, Luro, 22/08/2023

Líder Maksimu Dioseze Baukau ne’e hatutan, dala wain mosu problema barak tanba ema la hatene haraik an, maske ema ne’ebe hatene haraik an no rona ema seluk ne’e sei sai Diak.

“Dala barak mosu problema oioin tanba ema la hatene haraik an no rona ema seluk, ema ne’ebe hatene haraik an no rona ema, nia ne’e sei sai ema diak iha loron aban bainrua”. Nia subliña

Iha fatin hanesan, Krismadu Junilva Soares Sabino sente kontente tebes tanba bele partisipa no simu sakramentu krisma, maske Hela no eskola iha Dili

“Ha’u sente orgullu no gratidaun tanba bele hola parte iha sakramentu krisma ne’e hodi simu grasa, bensa no espíritu santu husi Maromak liu husi Bispu Dom Leandro Maria Alves, ohin iha Parokia Luro”. Tenik Krismadu

Krismante ne’e akresenta, “Simu sakramentu krisma ne’e hanesan momentu oportunu ba ami hodi halo komfirmasaun ba ami nia fiar hanesan sarani ida”.

Nune’e, liu husi biban leet ne’e hakarak fo agradesimentu wain ba Bispu Dioseze Baukau Dom Leandro Maria Alves ne’ebe bele to’o Luro ba dala uluk hodi fo Krisma ba sarani sira

“Ami agradese tebes tanba bele simu sakramentu krisma, agradese barak tebes ba Bispu Dioseze Baukau Dom Leandro Maria Alves tanba bele mai Luro no fo Krisma dahuluk ba sarani Luro-Lautem husi ninia Misaun foun hanesan Bispu Foun Dioseze Baucau, hafoin troka Maktoban Dom Basílio do Nascimento”. Nia hatete

Iha sorin seluk, Krismadu Cezaltina Pinto mos sente haksolok no onradu tanba bele simu sakramentu krisma husi Bispu Dioseze Baukau, la haluha agradese tebes ba Amo Paroku Luro Pe. Tiago Soares Sarmento tanba liu husi festa aniversáriu parokia nian bele hola inisiativa hodi komunika ho Bispu hodi fo Krisma ba sarani sira

“Ha’u agradese ba Bispu Dioseze Baukau Dom Leandro inklui Amu Paroku Luro Pe. Tiago Soares Sarmento tanba bele hola inisiativa hodi komunika ho Bispu to’o iha Luro, iha tempu hanesan bele fo krisma ba ami Krismadu 542, ida ne’e hanesan orgullu boot no grasa boot ida ba ami ne’ebe tuir”. Nia agradese

Iha Parte Seluk, Prezidente Komissaun Organizador Cesilio Soares mos fo agradese ba Bispu Dioseze Baucau no Autoriedade Sivil no Militar sira hotu ne’ebe kontribui hamutuk iha Serimónia Selebrasaun Aniversáriu Parokia Luro ba dala VI no krisma ba sarani sira

“Nu’udar Prezidente Komissaun, ho fuan no laran hato’o agradese ba Amu Bispu Leandro Maria Alves ne’e to’o iha Luro hodi festeza no fo Krisma ba sarani sira, Agradese mos ba ema hotu ne’ebe apoiu finanseiru no material sira ba serimonia ne’e husi inisiu to’o remata”. Nia dehan

Eis Administrador Postu Administrativu Luro ne’e mos husu sarani Parokia Luro hodi kontinua hamutuk tau fiar iha Maromak no servisu hamutuk hodi lori Parokia Nossa Senhora Ranha dos Apóstolos de Luro ba oin

Iha Serimónia ne’e hetan mos partisipsaun husi Presidente Autoriedade Munisipiu Lautém Domingos Sávio, Administrador Postu Luro Augusto Ramos Branco, Komandante PNTL Postu Luro, Kargu Sefia Sira, Sarani Sira inklui Krismante 542 ho nia aman inan sarani Sira

Jornalista : Luis Pailofo