LFTL Fo Sansaun Hamenus Pontu Ho Koima Ba SLB Laos Degrada Ba Divizaun Daruak

SAPNewsTL, Dili: Orgaun Liga Futebol Timor-Leste (LFTL) fo sansaun ba AD SLB Laulara ne’ebe la marka prezensa iha kampu Estadium Munisipal Dili kontra Karketu Dili FC iha loron mak hamenus pontu tolu no koima la’os degrada ba divizaun daruak iha Liga Timorense epoka tuir mai.

“Ami parte husi LFTL foti ona desizaun final ba AD SLB Laulara ne’ebe la marka prezensa iha kampu Estadium Munisipal Dili iha loron 21 fulan abril 2023 kontra Karketu Dili FC mak AD SLB Laulara hetan derrota ho rezultadu WO ho skore 5-0, hamenus pontu 3 husi pontu 17 ba pontu 14 no atribui sansaun koima ba AD SLB Laulara orsamentu montante 1000 USD no AD SLB Laulara la degrada ba divizaun daruak Liga Timorense ba epoka tuir mai tanba kestaun AD SLB Laulara nian agora diferente ho klube sira antes ne’e orgaun LFTL fo degradasaun ba klube sira”, dehan koordenador jeral  LFTL Octavio da Conceicão ba jornalista sira liu konferensia imprensa iha Estadium Munisipal Dili kinta (27/04/023).

Koordenador hatutan, sira fo sansaun ba AD SLB Laulara bazeia artigu 13 kompetisaun sura pontu alinea 4 iha regulamentu ba kompetisaun Liga Timorense ne’ebe sira tetu no análiza didiak ona no konsultasaun ba Komisaun etika dixiplina FFTL liu husi konsellu judisional Liga Timorense nune’e desizaun final ezekutivu Liga Timorense nian la iha intervensaun husi parte datoluk ida ne’e justu no parsial no tane as prinsipiu Fair play no lei jogu nian.

Octavio informa, rezultadu kampiaun divizaun dahuluk Liga Timorense epoka 2023 ne’e sei determina husi Karketu Dili FC kontra Porto Taibesse FC ho Emmanuel FC kontra Aitana FC tanba ekipa Karketu Dili FC ho Emmanuel FC iha oportunidade hotu tanba Karketu Dili FC daudaun iha pontu 15 no Emmanuel FC ho pontu 12 iha tabela klasifikasaun divizaun dahuluk Liga Timorense epoka ne’e.

Reportajen: Augusto dos Santos