Liga Timorense 2023, SLB Manan Emmanuel 2-0 Ho Jogador Nain-9

SAPNewsTL, Dili AD SLB Laulara FC manan Emmanuel FC 2-0 iha divizaun dahuluk Liga Timorense epoka 2023 ho jogador nain-9 tanba jogador husi klube ne’e nain rua hetan kartaun mean iha jogu laran.

Jogu AD SLB Laulara kontra Emmanuel FC hala’o iha Estadium Munisipal Dili sabadu 4/03/2023.

Iha jogu parte daruak ekipa rua ne’ebe mai ho ambisaun atu manan jogu ne’e bainhira kick off jogador husi ekipa rua ne’e halo kedas jogu tuir estratejia jogu idak-idak hodi halo presaun ba malu liu husi kontra atake ba malu ne’ebe iha minutu 23 jogador Zenivio Mota husi AD SLB Laulara marka golu halo redi Emmanuel FC nakdoko hodi hatuur kedas skore ba 1-0, maibe tama minutu 28 jogador marka golu ne’e tenki hetan kartaun mean no sai kedas husi jogu ne’e.

Lakon jogador ida AD SLB Laulara muda estratejia hodi hala’o jogu ho ofensivu deit para halo kontra atake deit no Emmanuel FC hare’e jogador adversariu menus ida sira halo jogu atraktivu hodi halo presaun makaas ba AD SLB Laulara maibe to’o minutu 45 remata skore nafatin 1-0.

Kontinua ba jogu parte daruak nian Emmanuel FC halo presaun hodi halo atake makaas ba AD SLB Laulara para atu marka golu maibe la konsege tanba AD SLB Laulara joga ofensivu hadau kontra atake deit tanba sira menus jogador ida ne’ebe tama ba minutu 72 AD SLB Laulara aumenta tan golu ida husi jogador Mouzinho de Lima hodi halo Emmanuel FC nia redi nakdoko ba dala rua hodi muda kedas skore ba 2-0.

Iha minutu 18 ikus Emmanuel FC halo aumenta ritmu presaun makaas liu tan ba AD SLB Laulara jogu defensivu deit ona hodi marka golu ida hodi muda skore maibe jogador AD SLB Laulara la fo oportunidade atu sira nia redi nakdoko no tama ba minutu 90 AD SLB Laulara tenki menus tan jogador ida tanba hetan kartaun mean entaun jogador hela nain 9 deit halo ekipa Emmanuel FC halo atake makaas liu tan maibe la konsege marka golu to’o minutu 90 remata skore nafatin 2-0 halo AD SLB Laulara hetan vitoria hadau pontu tolu husi Emmanuel FC.

Depois jogu remata asistente treinador Emmanuel FC Van Basten dehan, sira simu derrota tanba jogador kole semana ida ne’e joga dala rua kedas hasoru tan ekipa zigante iha Timor-Leste ne’e

“Ohin ami nia ekipa rezultadu derrota kontra AD SLB Laulara tanba ami jogador sira kole tebes ba orariu ne’ebe LFTL fo, ami hasoru ekipa boot Karketu Dili FC iha loron liu ba no ohin joga hasoru tan ekipa boot AD SLB Laulara ne’ebe hakarak husu LFTL hadia tan orariu sira ne’e para ita bele hetan kualidade jogu se lae hakarak ita atu joga para hala kompletu liga ne’e hau hanoin ita sei la hetan jogador sira hatudu kualidade jogu”, tenik Basten

Basten hatutan, kestaun ohin lakon ne’e sira hare’e laos lakon tatika maibe jogador lakon mentalidade iha jogu ne’e tanba jogador joven sira hasoru jogador AD SLB Laulara ne’ebe iha esperensia lubuk ona tan ne’e tatika ne’ebe sira fo ba jogador sira labele utiliza iha jogu ne’e tanba sira lakon iha pasajen no kontrola  bola.

Iha fatin hanesan treinador AD SLB Laulara Julião Monteiro hatete, ohin sira hare’e ekipa rua hatudu jogu furak maibe sira la satisfaz fali ba arbitrajen sira dirije jogu ne’e tanba la hare’e no sukat didiak mak foti desizaun.

“Jogu ohin ita hare’e furak tanba ami nia ekipa adversariu hatudu sira jogu no ami mos hatudu ami nia jogu maibe sira ladun satisfaz ba arbitrajen prinsipal ne’ebe dirije jogu tanba foti desizaun la hare’e no sukat didiak maibe  fo terus ba ami tanba jogador Zenivio Mota hetan kartaun mean iha minutu 23 no Gumario Morreira hetan kartaun mean iha minutu 90”, Julião informa

Entretantu jogu AD SLB Laulara kontra Emmanuel FC ne’e anima tebes adeptu sira tanba ekipa rua hatudu jogu furak tebes, AD SLB Laulara halo substituisaun ba jogador nain tolu no Emmanuel FC troka jogador nain lima no arbitrajen prinsipal fo kartaun mean  ba jogador AD SLB Zenivio Mota iha minutu 28 no Gumario Morreira iha minutu 90 no fo kartaun kinur ba jogador Emmanuel FC Juvito Moniz iha minutu 2023.