Lori Timor Ba Oin, PR Horta : Moderniza Ekonomia no Dada Kadoras Mai TL
SAPNewsTL, Nova Yorke : Relasiona ho Lansamentu ba programa modernizasaun ekonomia iha Timor Leste, Xefe Estadu Jose Ramos Horta sei lansa hamutuk ho Governu, Parlamentu Nasionál ho apoiu hosi líder nasionál, partidu politiku no organizasaun Naun Governamentál sira iha tinan 2023.
Tuir Nia Programa modernizasaun ekonomia ne’e, sei suporta direita hosi Billionáriu Amerikanu, iha ne’ebe nu’uar na’in ba Fundasaun Open Society Foundation, George Soros ho nia oan Alex Soros iha Estadu Unidus Amérika.
Prezidente Repúblika rasik husu ona ba sira, hodi halo estudu modernu, atu ajuda prosesu dezenvolvimentu iha Timor-Leste ba futuru.
“George Soros hakarak apoia Timor-Leste ba oin, ha’u husu ba sira, imi halo dokumentu ida hanesan dalan ida ba modernizasaun Timor-Leste nia ekonomia, ha’u hakarak lansa (programa) ne’e iha tinan 2023 hamutuk ho maun Boot Xanana, partidu hotu iha parlamentu ita haree oinsa maka rai ne’e atu la’o ba oin,”. Dehan PR Horta iha Nova Yorke, 26 Setembru 2022
Entretantu, Antes ne’e, PR Horta hala’o ona enkontru ho reprezentante Lideransa Fundasaun Open Society Foundation, George Soros nia ekipa iha Dili, hodi ko’alia kona-ba programa ne’ebé atu implementa iha Timor.
Timor-Leste tenki avansa ba oin ho prosesu dezenvolvimentu infraestrutura,ekonomia ne’ebé modernu ho teknologia ne’ebé di’ak. Tanba programa ne’e hola parte iha digitalizasaun ba ekonomia tomak Timor-Leste nian.
Programa modernizasaun ekonomia ne’e, sei la’o tuir Planu Estratejiku Dezenvolvimentu Nasional (PEDN) 2011-2030 ne’ebé antes ne’e governu anteriór kria no sosializa ona ba povu tomak maske nune’e, Maibe tuir Horta katak, planu hirak ne’e sei haree fila fali.
“Ita tenki estuda didi’ak Planu Estratejiku Dezenvolvimentu Nasionál (PEDN), planu ne’e sei validu kalae? parte (programa ou planu) parte hira ona maka governu iha tinan sanulu (10) liu ba ou mai ne’e ezekuta ona planu estratejiku ne’e, ou presiza hadia,” Sublinha Horta.
Atu moderniza ekonomia Timor-Leste, Horta eten nia parte sei servisu hamutuk ho Governu Timor-Leste atu mantein politika Timor-Leste hodi dada kadoras pipeline hosi tasi Timor ba rai Timor Leste.
“Politika Timor-Leste nian maka dada kadoras ba Timor-Leste,” tenik Horta.
Atu mantein politika dada kadoras ba Timor Leste, Horta dehan, Lider Nasionál, Kay Rala Xanana Gusmão mós halo ona enkontru ho Ministru Negosiu Estranjerus Austrália, Penny Wong iha Nova Yorke hodi reafirma pozisaun Timor Leste nian.
Jornalista : Vinsensius Saldanha
Editor : Luis Pailofo