Loron La’o Beibeik, PR Horta Husu Jerasaun Foun Prepara An & Prepara An Didiak
SAPNewsTL, Dili : Hafoin Partisipa Selebrasaun Aniversáriu Partidu Demokrátiku (PD) ba dala XXII iha Sede PD Kolmera Dili, Iha Intervista Presidente Repúblika José Ramos Horta haktuir Tempu la’o daudaun, Labele lakon tempu, tempu ne’ebe liu sei la fila, tanba ne’e tenki prepara an, prepara an no prepara didiak
“Ha’u mai hamutuk ho PD, tinan 22 liu tiha ona, Mensagem mak ne’e Prepara an, prepara an no prepara an, tanba ita la prepara an didiak, lakon tempu, loron la’o daudaun, loron ida ne’ebe liu la fila, ne’e duni prepara an to’o iha 2027 no 2028, Ukun sei tau iha jerasaun foun nia kabaz, desde 2002 jerasaun foun tama iha ukun to’o agora”. Tenik PR Jose Ramos Horta ba Jornalista sira, iha Sede Nasionál PD Kolmera, 10/06/2023
Xefe Estadu ne’e fundamenta, Guvernu foun entre Partidu CNRT no PD tenki halo buat ne’ebe diak liu, ekonomia ne’ebe forte, investimentu boot mai Timor Leste no halo povu nia moris sai diak liu
“Ha’u nia mandatu falta tinan haat, tinan haat mai ha’u sei buka servisu makaas ba jerasaun foun ho PD no FRETILIN iha 2027 ba oin, guvernu agora Avo Xanana ho PD, tenki halo buat ne’ebe diak liu, estruturasaun estadu nian iha setor hotu-hotu, ekonomia tenki sai forte para 2027 entrega nasaun ida unidade mak aas liu, demokrasia nafatin, povu nia moris la’o ho diak no investimentu boot mai Timor Leste”. Hatete PR Horta
Iha Parte seluk, kona-ba organograma governasaun foun, Presidente repúblika husu atu konsidera feto no involve feto iha governasaun tanba feto barak matenek iha mundu no Timor iha feto barak ne’ebe matenek
“Iha guvernu nia laram tenki haree tau feto, ita hotu moris husi feto, feto mak hakiak ita, feto mak tein, feto barak matenek iha mundu, Timor feto barak mak matenek, servisu diak liu mane sira, ne’e duni keta haluha fetos sira, ne’e mak ha’u nia rekomendasaun”, Subliha PR Horta
Entretantu, Antes ne’e Presidente Rede Feto Zelia Fernandes mos husu ba Partidu vensedor hodi involve feto no garantia ba igualidade jéneru iha guvernasaun dasia hodi feto sira assume responsabilidade hodi servi estadu Timor Leste tanba feto nia partisipasaun no kontribuisaun ne’e makaas tebes desde tempu resistensia
“Ami Sosiedade Sivil liliu Rede Feto hakarak husu Partidu sira ne’ebe manan atu implementa igualidade jéneru iha guvernasaun dasia, nune’e feto sira bele assume responsabilidade hanesan feto hodi kontribui ba desenvolviemntu nasaun nian, tanba feto nia partisipasaun no kontribuisaun ne’e makaas tebes desde tempu resistensia to’o ukun rasik an”. Dehan Presidente Rede Feto Zelia Fernandes ba SAPNewsTL iha Salaun Rede Feto Kaikoli, Dili, 01/06/2023
Enkuantu, Presidente Republika mos fo parabens ba Partidu Demokratiku ne’ebe selebra nia aniversariu ba dala XXII ne’ebe sei sai forte no buras liu iha Timor Leste
Jornalista : Ermelinda Soares