MACLN Realiza Torneiu Futsal Komemora Loron Veteranu 2023
Imajen: Diretor Jeral Interinu MACLN Aniceto Brites
SAPNewsTL, Dili: Ministeriu Asuntu Kombatete Libertasaun Nasional (MACLN sigla portuges) loke torneiu futsal hodi komemora loron veteranu 2023 ne’ebe sei monu iha loron 3 fulan marsu tinan ne’e.
“Ita hatene iha loron 3 fulan marsu ne’e loron ba veteranu nasional sira, tan ne’e iha tinan ne’e ita sei komemora hodi realiza torneiu futsal ho objetivu ita atu hametin relasaun amizade entre veteranu ho juventude sira iha Timor-Leste inklui hametin nasionalizmu no patriotizmu ba juventude sira atu hatene loron veteranu nasional ne’e monu iha loron 3 fulan Marsu”, Diretor Jeral Interinu MACLN Aniceto Brites ba jornalista sira iha nia knaar fatin Caicoli, Dili kinta (16/02/2023)
Diretor ne’e hatutan, rejistrasaun hala’o hotu ona. ekipa 10 husi lina ministerial sira iha Timor-Leste mak mai rejistu ona ne’ebe jogu ne’e rasik sei komesa iha loron 18 fulan fevereiru 2023 no remata iha loron 2 fulan marsu tinan ne’e, premiu ba jogu kampiaun sei hetan 750 USD ho tasa rotativa ida, manan nain daruak simu 550 USD ho tasa, manan nain datoluk simu 300 USD ho tasa.
Aniceto informa, jogu ne’e partisipa deit ho ekipa sanulu husi lina ministerial sira iha Timor-Leste tanba limitasaun tempu labele fo ba ministeiru hotu atu partisipa, jogu ne’e fundu apoiu rasik husi MACLN ho orsamentu montante 9.120 USD ne’ebe ba tinan oin sei realiza tan karik fundu iha tanba ne’e la tama ba planu prioridade MACLN.
Entretantu ekipa sanulu tuir kompetisaun ne’e mak MACLN A, MACLN B, RENETIL, Comite 12, MAE, BOP, SEJD, CNC, Alfandega ho MOP.
Reportajen: Augusto dos Santos