Maubere Oan Sempre Preparadu, PD Hasoru Malu Urjente Ho Presidente Repúblika

SAPNewsTL, Dili : Hafoin Partisipa Eleisaun Parlamentar 2023, Estrutura Nasionál Partidu Demokrátiku (PD) hasoru malu urgente ho Presidente Repúblika Jose Ramos Horta Iha Parlásiu Presidensial Nicolau Lobato Ai-Tarak Laran, Iha Intervista Presidente  PD  Mariano Assanami Sabino Lopes  haktuir objetivu husi hasoru malu ne’e hodi  fo parabens ba povu Timor Leste ne’ebe partisipa ona eleisaun parlamentar 2023 tanba bele la’o ho diak no susesu

“Parabens ba povu tomak tanba tuir eleisaun ne’e ho susesu no la’o di’ak,  Ami mai para kongratula deit, tinan ida Presidente Dr. Jose Ramos Horta nu’udar Presidente da Repúblika, Presidente republika mos fo Parbens ba PD nia diskursu no kampanha ne’ebe fo mensazen paz, dezenvolvimentu nian ne’ebe  iha palku leten nunka trata ema”. Tenik Presidente PD Mariano Assanami Sabino iha Palasiu Presidensial Aitarak Laran, 25/05/2023

Iha Parte seluk, Mariano Assanami hateten, Membru Guvernu Foun mai ne’e, importante iha méritu no matenek hodi servi no lori estadu Timor Leste ba oin

“Membru Governu, nia tenke iha meritu, méritu ne’e la sukat deit tanba  nia ne’e universidade ka  Doutoramentu katak nia iha kapasidade no kunesimentu klean ne’ebe ita tenke sempre aposta ba Estadu ne’e ida ne’ebe mak bele hodi Estadu ne’e la’o ba oin”.Nia dehan

Entretantu, kona-ba koligasaun ka plataforma, Presidente PD ne’e seidauk komenta tanba sei hein rezultadu final husi Tribunal de Rekursu, hafoin PD sei hola sira nia pozisaun

“Wainhira Partidu Vensedor iha ona, depois ko’alia koligasaun mak babain ema ko’alia primeiru plataforma, kompromisiu no programa saida, atu lori rai ne’e ba oin ne’e presiza matenek  no vontade, tanba  ita tinan 24 ona iha prosesu libertasaun povu ne’ebe ita tenke hakat  ona kuriji durante ne’e falha no la di’ak ita tenke kuriji, mas ita tenke dada Timor oan hotu-hotu para hateke ba oin no involve iha Governasaun hodi kontribui ba dezenvolvimentu”. Afirma Assanami

Lider PD ne’e mos hatutan, Partidu Demokratiku sempre prepara ninia kuadrus iha setor hotu-hotu hodi servi no kontribui  ba desenvolvimentu nasaun nian

Enkuantu, Bazeia ba rezultadu provizóriu ne’ebe Sekretariadu Tekniku Administrasaun Eleitoral  (STAE) fo sai katak Partidu CNRT hetan kadeira 31 ekivale 41,62%, Partidu FRETILIN hetan Kadeira 19 Ekivale 25,75%, Partidu Demokrátiku hetan Kadeira 6 ekivale 9,32%, Partidu KHUNTO hetan Kadeira 5 ekivale 7,52% no Partidu PLP hetan Kadeira 4 ekivale 5,88%

Jornalista : Ferderita Miranda