PR Horta Despede Atleta Paralímpiku Na’in-25 Ba Partisipa SPG 2023
SAPNewsTL, Dili: Prezidente Republika Timor-Leste Jose Manuel Ramos Horta halo despedida ba atleta paralimpiku nain-25 husi modalidade neen para atletizmu, badminton, natasaun, hit besi, xadres no tenis meja partisipa Sea Para Games (SPG) 2023 iha Cambodia.
“Oportunidade ne’e hakarak relata bá prezidente republika kona ba preparasaun atleta paralimpiku sira iha tinan ida-ne’e, hanesan jogu desportiva iha rejiaun sudeste aziatiku tinan rua-rua iha Sea Games no Sea Para Games ne’ebe xefe Estadu husik tiha ona kontijente Sea Games nian nune’e agora iha Timor-Leste sira lori ona medalla osan metan neen no ohin ita lori tan atleta paralimpiku hamutuk 25 husi modalidade neen atu prezidente halo despedida ba sira antes aranka ba partisipa jogu Sea Para Games 2023 iha Cambodia”, dehan SEJD Abrão Saldanha ba jornalista sira iha Palasiu Prezidente Aitarak Laran, Dili kinta (25/05/2023).
Sekretariu estadu hatutan, tinan kotuk sira nia prestasaun ho modalidade tolu lori medalla 12 mai Timor-Leste, kria istoria dahuluk ba Timor-Leste depois restaurasaun indepedénsia prestasaun ne’e as liu iha desportu nune’e fo onra no orgullu ba Timor-Leste tanba sira hatudu mezmu sira iha difisiensia fizika maibe sira nia potesialidade no kapasidade bo’ot tebes atu bele lori Timor-Leste bá oin, ho kontijente Timor-Leste nain-29 hein katak sira sei bele lori prestasaun di’ak liu ba Timor-Leste no sai embaixador ida diak ba rai ne’e iha sudeste aziátiku liu husi Sea Para Games.
Nia informa, sira nia preparasaun tinan ida ne’e nian, hahu dikak liu uitoan ho tinan kotuk, tanba hahú sedu uitoan, hein katak ho preparasaun sira nia prestasaun diak liu tan, tanba sira hatudu tiha ona prestasaun ida boot liu iha Timor-Leste nian mak tinan kotuk sira lori medalla 12 dala ida, hein katak ho kontijente bo’ot liu tan bele lori prestasaun as liu tan liuliu reprezenta Timor diak liu tan.
Iha fatin hanesan, Prezidente Repúblika Jose Manuel Ramos Horta dehan, nia sempre hakuak no hadomi ema hotu reprezenta Timor-Leste ba rai liur no iha rezultadu ne’e estadu sempre fo parabens maibe responsabilidade laos prezidente republika deit
“Hau nu’udar prezidente republika sempre hakuak no hadomi ema ho defisiénsia sira halo atividade tan ne’e bainhira reprezenta Timor-Leste partisipa kompetisaun iha rai liur no iha rezultadu ne’e estadu sempre fo parabéns nune’e ema hotu-hotu orgullu liutan maibe sira nia responsabilidade iha setór desportu laos prezidente republika deit” tenik prezidente
Xefe estadu ne’e haforsa tan, altleta sira ho difisiensia partisipa iha atividade desportivu rejionál no internasionál iha rai-li’ur, jogu ne’ebe sira partisipa iha rejiaun iha mundu tama ona iha komité paralimpiku internasionál nune’e atleta paralimpiku sira ne’e sempre reprezenta Timor-Leste.
Entretantu atleta paralimpiku nain-25 husi modalidade neen atu kompete Sea Para Games 2023 iha Cambodia ne’e mak atleta husi modalidade para atletizmu nain rua ofisial ida ho treinador ida, para tenis meza atleta haat, treinador ida, para badminton atleta ida, treinador ida ho ofisial ida, para nani atleta rua, treinador ida ho ofisial ida, para xadres atleta ida ho ofisial ida no modalidade para hit besi atleta rua, treinador ida no ofisial ida nune’e kontijente Timor-Leste hamutuk nain-29 aranka ba Cambodia maka atleta paralimpiku nain-25 ho delegasaun nain haat no sira sei aranka ba Cambodia iha loron 30 fulan maiu 2023.
Reportajen: Augusto dos Santos