ME Konsidera Edifísiu Eskola Nu’u Fatin Lulik Ba Ensinu Aprendijazem
SAPNewsTL, Lautem: Hafoin halo inaugurasaun ba edifisiu eskola foun lima iha munisipiu Lautem, Diretor Nasional ba Dezenvolvimentu Parke Eskolar Helio Lopes husu responsabilidade ema hotu-hotu nian atu tau matan ba instalasaun edifisiu eskola sira no konsidera edifisiu eskola hanesan fatin sagradu
Iha diskursu Diretor Nasional ba Dezenvolvimentu Parke Eskolar Helio Lopes haktuir ho konstrusaun eskola sala de aulas foun tenke marka mos historia foun ba prosesu Aprendijajem
Professors sira komesa hadia buat balun maske fasilidade seidauk kompletu, kontinua mellora iha ida-idak nia eskola, jere ida-idak nia eskola atu kontrola estudante sira, halo akompanamentu estudante importante liu mak oinsa bele orienta ema nia kakutak atu aproveita ho di’ak liliu ba ensinu aprendizajen nian
“Ho edifisiu foun, talves profesores sira mos muda ona ninia karakter, estudante mos iha ona rezultadu aproveitamentu ne’ebe foun kompara ho tinan anterior eskola a’at katak ita muda infraestrutura, nia sasan ida ke ohin bele halo maibe importante liu mak kuda ema nia kakutak bele aproveita iha prosesu aprendizajen ida ne’e mak valor bo’ot liu”. Dehan Diretor Nasional ba Dezenvolvimentu Parke Eskolar Helio Lopes iha Abere-Luro, Munisipiu Lautem, 11/09/2023
Diretor Nasional ne’e hatutan edifisiu eskola no fasilidade sira difisil atu hadia lalais iha tinan ida rua nia laran tanba ne’e presiza ema hotu nia responsabilidade ba edifisiu eskola sira
“Husu responsabilidade ba ema hotu-hotu, ita hotu-hotu, ba komunidade edukativas tomak,hahu husi inan aman, autoridade lokal, autoridade seguransa, veteranus sira ema hotu-hotu tenke tau matan ba edukasaun liu-liu ba instalasaun edifisiu sira ne’e importante teb-tebes”. Nia hameno
Diretor ne’e akresenta iha fatin balun eskola balun hafoin inaugura hetan estragus husi ema sira tanba ne’e presiza kuidadu edifisiu eskola sira no konsidera hanesan fatin sagradu hodi aprende atu nune’e labele estraga
“Eskola ne’e fatin ida ke sagradu, sagradu atu produs rekursu humanu ne’ebe mak lori obra Na’i maromak nian ba rai ida ne’e nia dezenviolvimentu ate mundu ne’e remata tanba ida ne’e konsidera edifisiu eskola sira ne’e hanesan fatin sagradu para ema labele estraga, hadomi no kuidadu edifisiu sira ne’e”.
Entretantu, Diretor Helio iha esperansa katak eskola lima ne’ebe inaugura ona sei diak nafatin maske laiha moru protesaun maibe nia konsidera ema ida-idak nia konsiensia nu’udar moru protesaun hodi bele proteje edifisiu eskola sira
“Konstrusaun ne’ebe mak finalizadu ona entrega fila fali ba eskola, komunidade inklui lider komunitariu sira, ha’u fiar katak eskola sira ne’e ohin inaugura, aban to’o tinan lima oin mai eskola sira ne’e sei nafatin hanesan ne’e maske ita laiha moru hodi halo protesaun ba eskola maibe ita nia moru mak ita nia konsiensia no ita nia responsabilidade hanesan sidadaun.” Nia hakot
Jornalista: Luis Pailofo