Presidente Repúblika Husu Atleta TL Hatudu Dixiplina Iha Asian Games 2023
SAPNewsTL, Dili: Ministeriu Juventude Desportu Arte Kultura (MJDAK) ho Konfederasaun Desportu Timor-Leste (sigla portuges CDTL) no Komite Nasional Olimpiku Timor-Leste (sigla portuges CONTL) lori delegasaun Timor-Leste inklui atleta nain-28 husi modalidade sanulu molok aranka ba China hasoru malu ho Presidente Repúblika Timor-Leste
Presidente Republika (PR) José Manuel Ramos Horta husu atleta Timor-Leste hatudu dixiplina iha iha Asian Games 2023 iha Hangzhou, China.
“Imi ba partisipa Asian Games nu’udar enviadu prinsipal Timor-Leste tan ne’e buat ne’ebe imi ko’alia no halo reflete ba Timor-Leste nia imajen, manan ka lakon ne’e laos preokupasaun boot ida ba Ha’u nu’udar Presidente maibe preokupasaun mak imi reprezenta Timor-Leste ho onra, dignidade ho unidade no nu’udar diplomata profesional dixiplina, hatudu respeita nunka falla tuir regulamentu nasaun imi ba ne’e, rona xefi ekipa ho treinador sira akompaña imi”,
Prezidente Repúblika José Manuel Ramos Horta saran lia hirak liu husi diskursu iha Palasiu Prezidente Aitarak Laran, Dili tersa (12/09/2023).
Prezidente Repúblika hato’o mos parabens ba atleta selesionadu husi federasaun sira reprezenta nasaun Timor-Leste, boaviajen, boasorte no susesu ba atleta sira iha Asian Games 2023 iha China
Iha fatin hanesan, Ministru Juventude Desportu Arte Kultura Nelyo Isaac Sarmento hatete, Ohin governu hamutuk CDTL ho CONTL lori atleta sira atu partisipa Asian Games 2023 mai kumprimenta Prezidente Republika molok atu ba China
“Ohin governu hamutuk CDTL ho CONTL lori ita nia atleta sira atu partisipa Asian Games 2023 mai kumprimenta prezidente republika molok atu ba partisipa Asian Games, eventu ne’e ba dala haat depois ita hetan ukun rasik an, nune’e kada tinan ita nia atleta no delegasaun aumenta, tinan ita nia delegasaun nain-56 ho atleta nain-28 inklui feto nain ualu husi modalidade sanulu”, tenik Nelyo
Ministru hatutan, esperansa ba atleta mak sira laos deit ba kompete Asian Games maibe nu’udar mos embaixador reprezenta Timor-Leste iha jogu Asian Games iha Hangzhou, China, hein katak atleta sira halo netik buat ruma bele hetan prestasaun
Nelio hatutan, buat ida jogu ne’e iha manan ho lakon, nune’e laos problema boot maibe importante mak hanesan prezidente republika hatete ona hatudu atitude dixiplina iha China
Nelyo informa, delegasaun Timor-Leste sei aranka ba Hangzhou, China ho grupu
Grupu dahuluk sei aranka uluk iha loron 14 fulan setembru 2023 no grupu ikus sei aranka iha loron 16 fulan setembru 2023 tanba jogu sei abertura iha loron 23 fulan setembru 2023 no ensera iha loron 8 fulan outubru 2023
Governu liu husi Ministériu Juventude Desportu Arte Kultura (MJDAC sigla portuges) apoiu orsamentu ba delegasaun Timor-Leste partisipa Asian Games 2023 iha Hangzhou, China kuaze 400,000 USD.
Nia afirma tan, governu la fo tarjetu ba atleta sira husi modalidade 10 kompete Asian Games 2023 iha Hangzhou, China maibe enkoraja deit ne’e mak kondisaun governu prepara, karik atleta ida mak hetan prestasaun ne’e orgullu ida ba Timor-Leste no motiva tan Timor-Leste sira iha liur la gosta desportu bele ona halo atividade desportu hodi ba partisipa eventu internasional sira.
Entertantu, atleta nain-28 husi modalidade sanulu kompete Asian Games 2023 iha Hangzhou, China mak atleta nain haat husi modalidade atletizmu, nain haat husi boxing, nain haat husi taekwondo, nain tolu husi karate-do, nain haat husi voleibol praia, nain rua husi tenis kampu, nain rua husi badminton, nain rua husi natasaun, nain rua husu tiru, nain ida husi halterifilizmu no kada atleta sira sei akompaña husi treinador ida no asistente treinador ida.
Reportajen: Augusto dos Santos