Médiku SAMES 100% Timorense, PR Horta Prefere 30% Ai-Moruk Husi Rai-Laran

SAPNewsTL, Dili: Prezidente Republika Demokrátika Timor Leste, José Manuel Ramos Horta halo vizitasaun ba Serviço Automono de Medicamento e Equipamentos de Saúde (SAMES sigla portugés)  hodi hare’e atividade servisu liu-liu medikamentu Saúde nian, Presidentede Horta hateten nu’udár Xefe Estadu tenke iha kuñesimentu ba ministériu idak-idak nia servisu iha rai laran.

“Ha’u mai vizita SAMES nu’udar sidadaun ida no nu’udár Xefe Estadu ne’ebé tenke buka aprende, ha’u sempre  rona kona ba servisu Ministeriu sira husi Primeiru Ministru, ne’ebé ha’u  so akompaña de’it para hatene tanba nu’udár Prezidente tenke hetan koñesimentu jeral maski la maksimu kona-ba setor oi-oin ne’ebé iha rai laran”. Dehan Prezidente RDTL José Manuel Ramos Horta ba Jornalista sira iha salaun SAMES kampo Alor, Dili, Segunda-Feira (01/08/2022).

Xefe estadu ne’e hatutan, agora sistema ne’ebé mak iha SAMES organizadu tebes tanba Médiku no Farmasia 100 % mesak Timor oan la’os hanesan tempo uluk.

“Ha’u nia observasaun ruma ne’e ha’u sei fahe ho Primeiru Ministru maibé ha’u  hakarak hare’e uluk kondisaun  ne’ebé funsiona iha ministériu sira mais ou menus superfisionalmente hodi bele organiza sistema ne’ebé iha no agora de’it buat ne’e la’o neneik dezde husi tempu UNTAET to’o ohin, maibé agora Timor oan  100 %  mak iha SAMES, ita hare’e 100 % mediku Timorense, famasia Timorense no ema sira parte jestaun ne’e mos Timorense ita tenke buka mak halo di’ak liu tan kada tinan”. Tenik Prezidente.

Ramos Horta Informa, iha tempu badak bainhira guvernu aprova orsamentu para halo infraestrutura seluk ne’ebé adekuado atu nune’e Timor bele halo liu tan Produsaun medikamentu para labele 100 % husi liur no  tékniku la sufisiente bele halo parseria ho nasaun sira hanesan Brazil, Cuba, Portugal no Indonesia hodi halo fábrika medikamentu ba Timor Leste rasik no ba merkadu iha liur ne’ebé uza  fundu soberanu para halo investimentu duni garante autosufisiente maski la 100 % maibé 30 % nune’e ai-moruk ne’e bele halo iha rai laran

Iha fatin hanesan Vise-Ministru Saúde Bonifacio Mau Colo dos Reis hateten durante tinan lima foin dahuluk Prezidente José Manuel Ramos Horta vizita SAMES hodi observa infraestrutura rekursu umanu no medikamentu ne’ebé mak iha SAMES.

“Loron ohin importante tebes tanba ba dahuluk sua ekselénsia Prezidente Repúblika mai vizita SAMES hodi hare’e diretamente infraestrutura, rekursu umanu no mos medikamentu ne’ebé mak durante ne’e iha no nia rekomendasaun  prinsipal mak oinsa hasa’e kapasidade rekursu humanu”. Dehan Vise MS Bonifacio

Entretantu, Vise Ministru ne’e akresenta, armazena medikamentu sira no halo investimentu ba fabrika medikamentu

“Iha VIII  governu  konstitusional ne’ebé sei lidera husi AMP, ha’u rasik ba vizita iha Cuba ne’e prontu atu apoia hanesan lori materia prima sira atu mai servisu hamutuk  maibé ha’u hakarak  SAMES ne’e  governu presiza atu tau osan liliu apoiu husi Parlamentu Nasional hodi tau osan barak tanba ita la iha kapasidade atu harii mesak, ita tenke halo parseiru ho nasaun sira seluk”. Bonifácio dehan

Enkuantu, Vise-ministru ne’e afirma, Infraestrutura konserteza atu halo fábrika presiza rai sufisiente hanesan ohin Prezidente hare’e iha parte sorin  disponibiliza ona medikamentu sira no agora dadaun hare’e sira atu sosa aimoruk presiza hare’e orsamentu ne’ebé mak governu  aloka ba SAMES nu’udár institutu ne’ebé  autonomia administrativu no  iha orsamentu rasik, sira halo ona akreditasaun ba ai-moruk sira no hein katak iha final Agustu ne’e ai-moruk sira tama hotu ona tuir sira presiza ne’ebé nia tipu hamutuk 513  mak atu utiliza iha SAMES.

Reporter : Marcela Mery da Costa & Aquelina Taec

Editor     : Augusto dos Santos