Mosu Golu Hitu, DIT Manan Santa Cruz 5-2

SAPNewsTL, Dili: DIT FC manan Santa Cruz FC ho skore 5-2 iha jornada dahaat divizaun daruak Liga Timorense epoka 2023 nune’e jogu husi ekipa rua ne’e hamosu golu barak.

Jogu DIT FC kontra Santa Cruz FC hala’o iha Estadium Munisipal Dili domingu (26/03/2023).

Iha jogu parte dahuluk bainhira kick off jogador sira husi ekipa rua muda bola ain ba ain hodi halo presaun no atake ba malu ekipa rua hetan oportunidade ameansa baliza kada ekipa ne’ebe tama ba minutu 23 jogador Romario Moniz husi DIT FC marka golu halo redi adversariu nakdoko hatuur kedas skore ba 1-0.

 Skore refere ekipa rua nia jogu lao manas tan tama ba minutu 25 DIT FC aumenta tan golu husi jogador Jose Dos Santos muda fali skore ba 2-0, rezultadu refere jogador husi Santa Cruz FC halo presaun makaas atu responde golu husi adversariu maibe jogador DIT FC la fo oportunidade ne’ebe tama minutu 45 Santa Cruz FC tenki sofre tan golu husi jogador DIT FC Serafim Brito hodi muda fali skore ba 3-0 halo DIT FC lidera minutu 45 jogu parte dahuluk ho skore 3-0.

Kontinua ba jogu parte daruak ekipa rua muda estratejia jogu nian, jogador husi Santa Cruz FC halo presaun makaas ba adversariu nune’e sira konsege marka golu rua tuirtuir malu iha minutu 51 husi jogador Paul Godinho no minutu 53 husi jogador Arsenio Amaral muda kedas skore ba 2-3.

Rezultadu refere halo ekipa rua hasa’e ritmu jogu halo presaun no atake makaas ba malu tanba sira hakarak sai manan nain iha jogu ne’e, tama ba minutu 62 jogador Romario Moniz aumenta tan golu hodi muda fali skore ba 4-2.

Skore 4-2 halo jogador sira husi Santa Cruz FC halo ekipa rua nafatin halo jogu hodi hetan oportunidade kontinua halo ameansa baliza kada ekipa nian tama ba minutu 75 jogador Elvis Silva husi DIT FC marka tan golu hodi muda skore ba fali 5-2 no iha minutu 15 ikus la tan jogador ida husi ekipa rua marka golu tan maski tenta ameansa nafatin baliza kada ekipa nain tan ne’e jogu minutu 90 remata skore nafatin 5-2 rezulta golu hitu akontese iha jogu refere hodi halo DIT konskita vitoria kontra Santa Cruz FC no hetan pontu tolu.

Depois jogu remata treinador Santa Cruz FC Moises Da Silva hatete, ohin jogu furak jogador sira konsege sai sofre golu tolu iha jogu parte dahuluk nian maibe lina defeza fasil adversariu marka golu.

“Jogu ohin lao furak hau apresia hau nia jogador sira tenta sai husi sofre golu tolu iha jogu parte dahuluk nian tama parte daruak hau nia jogador sira konsege marka golu rua maibe hau nia jogador lina defeza fasil liu ba adversariu hatama golu”, tenik Moises

Moises hatutan, jogu ohin sira faila iha lina defeza tanba fasil adversariu marka golu no lina avansadu faila iha finalizasaun ba jogu tuir mai sira sei hadia faila sira ne’e.

Iha sorin seluk treinador DIT FC Mial Armand dehan, ohin jogu lao diak tebes maibe sira nia jogador sira lakon konsentrasaun jogador adversariu marka golu rua.

“Jogu ohin ami hasoru Santa Cruz FC lao diak tebes maibe hau nia jogador sira lakon konsentrasaun tanba iha jogu parte dahuluk hau nia jogador sira marka tiha ona golu tolu tama fali ba jogu parte daruak nian jogador sente iha anin leten ne’ebe iha minutu 15 nia laran jogador adversariu konsege marka golu rua tan ne’e ami halo mudansa fali ba jogador sira aumenta tan golu rua iha jogu parte daruak nian”, Mial hateten

Enkuantu asistente treinador DIT FC Alex Cham akresenta tan, ba jogu tuir sira sei hadia jogador sira iha lina baliza, defeza, mediu no avansadu tanba ohin sira halo sala 

“Ba jogu tuir mai ami sei hadia lina hotu baliza, defeza, mediu no avasadu tanba kuaze jogador sira iha lina sira ne’e halo sala tanba ami hakarak jogu tuir mai ami manan hotu no ohin jogador avansadu sira faila barak iha finalizasaun tanba tuir lolos ami halo golu barak sai hanesan lisaun ba ami para hadia diak liu tan”, Alex afirma 

Entretantu iha jogu ne’e DIT FC halo substituisaun ba jogador nain lima no Santa Cruz FC mos troka jogador nain lima, jogador DIT FC Aderito Fernandes, Serafim Brito no Nelson Boavida hetan kartaun kinur no jogador Santa Cruz FC Juninho da Costa hetan mos kartaun kinur no Rui Amaral hetan kartaun mean, rezultadu 5-2 lori DIT FC lidera provizoriu tabela klasifikasaun divizaun daruak Liga Timorense epoka ne’e ho pontu 10 husi jogu manan dala tolu ho impata ida no Santa Cruz FC okupa pozisaun dahitu ho pontu 3 husi jogu manan dala ida no lakon tolu.

Reportajen: Augusto dos Santos