Selebra Loron Mundial Ba Bee, BTL.EP Rekunhese Komunidade Barak Sei Falta Bee
Imajem Diskursu Diretor Operasaun no Manutensaun BTL Aleixo dos Santos, iha Auditorium Fakuldade Enjenharia Siensia no Teknolojia UNTL, Hera, 23/03/3023
SAPNewsTL, Dili : Relasiona ho Selebrasaun Mudial Bee 2023 iha mundu, Instituisaun Bee Timor Leste, Empreza Publika (BTL.EP) hamutuk ho nia parseria sira, sexta-feira semana kotuk realiza seminariu ho tema “Valoriza Bee, Rekunhese Espesialmente Papel Importante Ekosistema ne’ebe Saudavel, iha manutensaun abastesimentu Bee Iha Mundu Tomak”, ba estundante Universidade Nasional Timor Lorosa’e (UNTL) liliu ba Departamentu Enjenheria Sivil, Enjenharia Geologia no Petroleu hamutuk atus tolu resin
Seminariu ne’e realiza iha Auditorium Fakuldade Enjenharia Siensia no Teknolojia UNTL, Hera, 23/03/3023
“Ohin Ita selebra loron bee nian iha mundo tomak, bee importante teb-tebes, bee mak fo moris mai ita ema, balada, ai horis iha Mundo tomak. Ita hotu tenki valoriza, konserva no maneja bee iha Mundu liliu iha Timor Leste, Ita hotu haree no ko’alia kona-ba bee, iha Timor difisil tebes ba bee liuliu iha Dili rekurus bee ne’e susar tebes”. Tenik Diretor Operasaun no Manutensaun BTL Aleixo dos Santos iha nia apresentasaun
Diretor ne’e hatutan “Ami representante husi BTL, I.P orgullo no apreisia tebes ba loron ohin katak bele selebra loron mundial ba bee hamutuk ho estudante universitariu sira, ha’u husu ba estudante enjenaria sira estuda makaas, aprende nafatin, desenvolve kunhesimentu, oinsa atu uza ita nia Kapasidade no ideolojia hodi desenvolve rekursu bee iha Timor laran tomak ba populasaun sira iha futuru”.nia dehan
Nia akresenta, “Bee ne’ebe ita sei presiza iha Dili laran, ne’e kada segundu presiza 800 litrus, Planu ba bee ita halo ona no preserva ona hein ba tinan ida ne’e, ita atu aprensenta mak 800 hidrojigeno M2, Bee ne’ebe ita foti ne’e sei mai husi rai okos no fura husi rai okos mak hodi hetan bee, oinsa ita projeta ba tinan 10 mai, tanba bee menuz no la to’o ba komunidade sira”. nia informa
Imajem : estundante Universidade Nasional Timor Lorosa’e (UNTL) liliu ba Departamentu Enjenheria Sivil, Enjenharia Geologia no Petroleu
Orador ne’e fundamenta, Bee mai husi ai-horis sira, entaun ema hotu tenki kuidadu no proteje ai-horis sira inklui labele koko estraga beibeik ai-horis no kontribui oinsa asegura no konserva bee tanba bee limitadu, tanba wainhira bee maran, balada sira bele mate no ai-horis sira bele mate, ikus mai laiha bee ba ema, ema bele mate
Entretantu, Bee Timor Leste hari’i bazeia ba lei nu. 41/2020/27 de Setembro ho objetivu atu promove investimentu hodi responde ba metas planu estratejiku desenvolvimentu nasional (PEDN 2011-2030) no objetivu desenvolvimentu sustentavel (ODS 6), hasa’e kobertura ba bee-moos no saneamentu ka halo kanalizasaun ba bee hodi hamenuz moras sira ne’ebe kauza husi bee ne’ebe laiha kualidade no ajuda guvernu hamoris setor saude, edukasaun, agrikultura, ekonomia, turizmu no seluk tan
Iha Fatin hanesan, Diretor Departamentu Enjenharia Sivil Aleixo Xavier agradese ba BTL no AdP tanba bele realiza seminariu ba estudante sira hodi selebra hamutuk lorn mundial ba bee iha mundu liliu Timor Leste
“Ha’u apresia no agradese ba BTL no AdP ne’ebe ho laran luak bele hili fakuldade enjenharia siensia no teknolojia UNTL hodi sensibiliza no komemora loron mundial ba bee no transmite importansia bee ba komunidade em jeral”. hatete Diretor Departamenru Enjenaria Sivil Aleixo Xavier
Selebrasaun Loron Mundial ba bee monu iha loron 22 fulan marsu ne’e ho motto “Accelerating change to solve water and sanitation crisis”, signifika Aselera Mudansa hodi rezolve krisi bee no sanitasaun iha mundu.
Iha adisaun, tuir informasaun ne’ebe SAPNewsTL kolleta Komunidade barak iha territoriu Timor Leste sei falta bee no balun sei konsumu udan been tanba susar atu asesu ba bee liliu iha Suku Bikeli Munisipiu Atauro ne’ebe daudaun ne’e komunidade sira kontinua konsumu udan been desde ukun an to’o agora
Jornalista : Dulcio Antonino da Silva