Manan Assalam 2-1, SLB Kontinua Lidera Tabela Klasifikasaun Liga Timorense 2023

SAPNewsTL, Dili: AD SLB Laulara kontinua lidera provizoriumente tabela klasifikasaun hafoin manan Assalam FC ho skore 2-1 iha jornada dalimak divizaun dahuluk Liga Timorense epoka 2023.

Jogu AD SLB Laulara kontra Assalam FC hala’o iha Estadium Munisipal Dili kinta 30/03/2023.

Iha jogu parte dahuluk bainhira kick off jogador husi ekipa rua foti inisiativa hodi halo presaun no atake ba malu, AD SLB Laulara ne’ebe la reforsa ho jogador estrela Timor-Leste Mouzinho de Lima marka golu halo redi Assalam FC nakdoko iha minutu 1 husi jogador Michel Hutabarat muda skore ba 1-0.

Skore 1-0, halo ekipa rua nia jogu komesa manas ona tanba ekipa rua halo presaun no atake ba malu makaas liu tan ne’ebe tama ba minutu 39 Assalam FC konsege responde golu AD SLB Laulara husi jogador Martinho Belo muda fali skore ba 1-1.

Skore 1-1, jogador sira husi AD SLB Laulara muda bola ain ba ain halo presaun makaas ba Assalam FC no jogador sira husi adversariu halo jogu mos halo kontra atake makaas ba AD SLB Laulara, tama ba minutu 45+1 jogador Zenivio Mota husi AD SLB Laulara marka tan golu halo redi Assalam FC nakdoko ba dala rua hodi halo AD SLB Laulara lidera jogu parte dahuluk minutu 45 remata skore 2-1.

Kontinua tama ba jogu parte daruak jogador sira husi ekipa rua muda jogu tuir treinador sira nia estratejia hodi nafatin muda bola ain ba ain hodi aumenta tan ritmu jogu nian, Assalam FC ne’ebe sofre golu rua jogador sira halo presaun makaas ba adversariu hodi atu marka golu maibe jogador sira husi adversariu la fo oportunidade.

 Jogador sira husi AD SLB Laulara mos halo atake makaas ba adversariu atu aumenta tan golu maibe la konsege tanba jogador Assalam FC mos la fo oportunidade mos tan ne’e jogador sira husi ekipa rua la marka tan golu maski sira hetan oportunidade barak ameansa baliza kada ekipa nian to’o minutu 90 remata skore nafatin 2-1 rezulta AD SLB Laulara konkista vitoria no hetan pontu tolu kontra Assalam FC kontinua lidera provizoriumente tabela klasifikasaun iha jornada dalimak divizaun dahuluk Liga Timorense epoka 2023.

Depois jogu remata treinador Assalam FC Gaspar Amaral hatete, sira derrota maibe orgullu ba jogador sira tanba hatudu jogu tuir preparasaun sira halo durante semana ida 

“Ohin derrota maibe orgullu ba hau nia jogador sira tanba preparasaun durante semana ida ami halo hatudu duni iha kampu maibe tanba jogador sira deskansa ladun diak monu iha jogu parte daruak nian no golu hau nia jogador ohin marka ne’e rezultadu husi preparasaun tanba ami hatene ekipa AD SLB Laulara joga diak ami labele halo jogu atake husi lina extremu nian maibe tenki liu husi klaran”, Gaspar heteten

Gaspar hatutan, jogu tuir mai sira sei halo preparasaun diak liu tan tanba sei kontra ekipa Karketu Dili FC jogu sei la fasil ba sira tanba ohin nia jogador ida prinsipal ida iha lina defeza hetan kartaun mean 

Iha sorin seluk asistente treinador AD SLB Laulara Efrem Jeronimo dehan, Nia sente kontente tanba jogador sira esforsu duni hatudu jogu tuir preparasaun no jogu tuir mai sei esforsu nafatin tanba ekipa sira seluk mos hakarak hetab pontu tolu.

“Hau sente kontente tanba ohin jogador sira esforsu duni hetan pontu tolu maski barak hetan problema fiziku tanba iha klube haat mak iha oportunidade sai kampiaun, rezultadu ohin ne’e ami kontente tanba jogador sira hatudu jogu tuir preparasaun ami halo no jogu tuir mai sira sei esforsu nafatin tanba ekipa sira seluk hakarak hetan pontu tolu”, tenik Efrem

 

Entretantu rezultadu jogu 2-1, lori AD SLB Laulara kontinua lidera provizoriumente tabela klasifikasaun iha jornada dalimak divizaun dahuluk Liga Timorense epoka 2023 ho pontu 11 husi jogu manan dala tolu ho impata rua no Assalam FC provizoriu okupa nafatin pozisaun daruak ho pontu 8 husi jogu manan dala rua, impata rua no lakon rua.

 

Reportajen: Augusto dos Santos