Nagarjo Impata Kontra Zebra Ho Skore 1-1
Imajen: Jogador Zebra FC Ataka Jogador Nagarjo FC iha Estadium Munisipal Dili kuarta (29/03/2023).
SAPNewsTL, Dili: Nagarjo FC impata kontra Zebra FC ho skore 1-1 iha jornada dahaat divizaun daruak Liga Timorense epoka 2023 nune’e ekipa rua tenki fahe pontu ida-ida ba malu.
Jogu Nagarjo FC kontra Zebra FC hala’o iha Estadium Munisipal Dili kuarta 29/03/2023
Iha jogu parte dahuluk bainhira kick off ekipa rua halo jogu muda bola ain ba ain hodi halo presaun no atake ba malu ne’ebe tama ba minutu 14 jogador Abrão Mendonça husi Nagarjo FC marka golu halo redi adversariu nakdoko hatuur kedas skore ba 1-0.
Skore refere halo ekipa rua nafatin halo jogu tuir ida-idak nia estratejia halo presaun no atake nafatin ba malu ne’ebe tama ba iha minutu 40 jogador Dionizio da Silva husi Zebra FC marka golu halo redi Nagarjo nakdoko muda skore 1-1 to’o jogu parte dahuluk minutu 45 remata skore nafatin 1-1 tanba jogador sira husi ekipa rua la aumenta tan golu.
Tama ba jogu parte daruak nian ekipa rua muda estratejia jogu nian halo presaun makaas ba malu ho jogu ritmu manas hodi ameansa baliza kada ekipa nian dala barak maibe jogador sira husi ekipa rua la konsege aumenta tan golu to’o minutu 90 remata skore nafatin 1-1 rezulta ekipa rua tenki fahe pontu ida-ida ba malu.
Imajen: Tabela Klasifikasaun Jornada Dahaat Divizaun Daruak Liga Timorense epoka 2023
Entretantu rezultadu Impata 1-1 ne’e lori Zebra FC provizoriu okupa pozisaun dahaat iha tabela klasifikasaun iha jornada dahaat divizaun daruak Liga Timorense epoka 2023 ho pontu 5 husi jogu manan dala ida, impata rua ho lakon ida no Nagarjo FC provizoriu okupa pozisaun daualu ho pontu 2 husi jogu impata rua no lakon rua.
Reportajen: Juvinal Camoes