MTCI no MACLN Asina MoU, Governu Prevê Orsamentu $128 Mil Dezenvolve Sítiu Turistiku
SAPNewsTL, Dili: Ministerio do Turismo Comercio e Industria (MTCI) liu husi Diresaun Geral Turismo (GTM) halo asina Akordu Kooperasaun/memorandum of Understanding (MoU) ho Ministerio para os Assuntos dos Combatente da Libertasaun Nasional (MACLN) iha ambitu dezenvolvimentu protesaun turismu istóriku (Turismo Rezistensia) hodi halo promosaun ba sitiu istóriku sira iha Timor Leste.
Tuir Ministru Assuntu dos Combatente da Libertação Nasional Júlio Sarmento da Costa “META MALI” hateten ohin loron MACLN halo kooperasaun ho MTCI hodi assina akordu ida hodi proteje fatin istoriku.
“Banhira simu konvite husi Ministeiru ami diskute buat barak, entaun ami konvensidu atu bele kontribui bele sai entendimentu ida sai ba futuru aban bain rua nian, ministériu rua ne’e bele servisu hamutuk iha aspektu fatin sira ne’ebé sai fatin istóriku ba nasaun ne’e nian”. Dehan Ministru Assuntu dos Combatente da Libertação Nasional Júlio Sarmento da Costa “META MALI”, iha salaun enkontru V-MTKK, Farol, Kinta-Feira, 22/09/2022.
Ministru ne’e mos agradese ba MTCI tanba Ministru Turismu bele hakat no kolabora ba malu atu sira bele foti medida ba fatin istoriku tanba sira hatene mos turismu la’os ko’alia de’it istoriku maibe iha kultural no relijiozu.
Iha fatin hanesan MTCI José Lucas do Carmo da Silva afirma, asina akordu ohin ne’e hanesan pasu ida ne’ebé mak halo ho MACLN atu promove fatin istoriku sira iha Timor Leste.
“Objetivu assina memorandu entendementu ida ho Ministeriu MACLAN, oinsa bele iha koperasaun di’ak liu tan para halo promosaun ba ita nia sitiu turismu ne’ebé iha, ita ko’alia kona-ba sitiu istoriku sira oinsa mak tau iha pakote turismu nian para ita halo promosaun área turismu iha rai laran no mos rai liur”. Tenik nia
Nia hatutan liu husi asina memorandu entendimento ne’e atu konserva istoria sira no oinsa prezerva atu hatama reseita ba estadu no sai lisaun ba jerasaun tuir mai.
“Atu konserva istoria ne’ebé mak ita iha, bainhira ita iha libertasaun nian iha pakote turismu ninian, oinsa preserva no mos bele hatama reseita ba ita nia nasaun, nune’e mos patrimoniu estadu sai istoria ne’ebé mak edukativu ba ita nia jerasaun tuir mai”. Nia subliña
Governante ne’e fundamenta tan, Ministeiru rua ne’e halo diskusaun hodi identifika fatin istoriku no halo mos konsultasaun bá ekipa Ministeiru Turismu Komunitariu, veteranus sira .
“Progresu ne’e la’o fulan sia ona iha prosesu ida ne’ebé entre ministeiru rua halo diskusaun atu identifika fatin sira ne’e, iha mos konsultasaun husi ministeiru, ekipa ministeiru turismu komunitariu kultura nian ba hamutuk ho maluk veteranus sira iha rejiaun sira hotu no identifika ona fatin sira atu dezenvolve”. Nia informa
Entretantu sira hili ona fatin sira hanesan Viqueque, Lospalos, Uatulari, Baucau,no Lacluta, sira konsidera nu’udar prioridade ida ne’ebé iha faze aprovijionamentu ho orsamentu por volta $ 128 mil USD ba programa ne’e.
Jornalista : Marcela da Silva
Editor : Aleixo Ximenes