Nivio: Direitu Aniceto Berlelo Iha AAF-TL Ho Kongresu FFTL La Iha Ona
SAPNewsTL, Dili: Prezidente atual Assosisaun Arbitrajen Timor-Leste (AAF-TL) Nivio da Costa Fernandes konsidera Aniceto Berlelo nia direitu iha AAF-TL ho kongresu Federasaun Futebol Timor-Leste (FFTL) tuir mai la iha ona tanba nia mandatu prezidente AFF-TL remata ona iha loron 3 fulan marsu 2023.
Antes ne’e prezidente sesante Aniceto Berlelo hatete ba publiku liu husi RTTL katak kongresu ordinariu daruak AAF-TL periodu 2024-2028 realiza iha loron 20 fulan janeiru 2024 ne’e ilegal, nia mak iha direitu votu bainhira FFTL realiza kongresu tuir fali mai no tuir lolos AAF-TL labele halo kongresu uluk FFTL tanba agora ne’e prezidente FFTL seidauk iha.
“Aniceto Berlelo la iha ona kompetensia iha AAF-TL no direitu votu iha kongresu FFTL tuir mai tanba estrutura foun AAF-TL iha ona tuir lejitimidade hetan fiar husi kongresista sira iha kongresu AAF-TL daruak 2024-2028, Aniceto Berlelo la iha direitu ona atu koalia maibe se nia nafatin koalia iha kotuk ita husik deit tanba lejitimidade iha ami nia liman laos nia,”
“Aniceto Berlelo dehan kongresu ordinariu AAF-TL foin daudauk ilegal hau sente komik tuir lolos Aniceto Berlelo mak ilegal tanba lejitimidade iha ami nia parte ona laos Aniceto Berlelo, ami estrutura foun AAF-TL periodu 2024-2028 mak iha direitu votu ba kongresu FFTL tuir mai prezidente sesante Aniceto Berlelo la iha ona”, dehan prezidente atual AAF-TL Nivio da Costa Fernandes ba jornalista sira iha edifisiu FFTL Bairro Formosa, Dili (30/01/2024).
Prezidente atual hatutan, sira hakarak hatete ba públiku katak mandatu prezidente sesante Aniceto Berlelo remata ona iha loron 3 fulan marsu 2023, nune’e besik tinan ida ona Aniceto Berlelo la konvoka reuniaun para halo kongresu bazeia ba artigu 32 tanba saida mak prezidente sesante dada kuaje tinan ida, nia uza nia otoriter para uza arbitrajen sai ninia instrumentu ne’e labele akontese tanba ne’e vise prezidente ho sekretariu jeral iha mos kompetensia hamosu kongresu.
“Nune’e iha inisiativa realiza kongresu AAF-TL daruak ne’e tanba sira bolu Aniceto Berlelo la kopera, nia mesak labele kontra ema barak”.
Nia informa tan, antes Aniceto Berlelo nia mandatu prezidente AFF-TL seidauk remata ne’e nia legal maibe agora Aniceto Berlelo lae ona tanba lejitimidade ne’e husi asembleia, kongresista sira mak detemina prezidente tanba buat hotu tuir nia dalan.
AAF-TL realiza kongresu daruak periodu 2024-2028 tanba hetan karta autorizasaun husi prezidente interinu FFTL Domingos Raul “Falur Rate Laek” depois la liu husi komisaun eleitoral FFTL tanba daudaun problema hela, lejitimidade ba AAF-TL agora iha estrutura atual nia parte laos Aniceto Berlelo nia parte tanba estrutura atual hetan fiar husi kongresista mai husi koordenador arbitrajen futebol munisipiu 13 ho futsal hamutuk nain-17.
Nivio salienta tan, antes sira halo kongresu ordinariu ne’e sira konvida prezidente sesante Aniceto Berlelo atu mai partisipa nune’e Aniceto Berlelo mos iha komitmentu no prontu kompete iha kongresu AAF-TL ba daruak ne’e tanba nia rasik mai iha FFTL foti konvite direita husi prezidente atual AAF-TL depois Aniceto Berlelo halo asinatura simu nian, sira iha evidensia kompletu ba ida ne’e maibe sira la hatene tanba saida Aniceto Berlelo la partisipa sira iha kongresu AAF-TL ne’e rasik to’o ikus nia deklara ba públiku liu RTTL katak kongresu AAF-TL ne’e ilegal.
Fundador arbitrajen afima tan, Aniceto Berlelo mos kestiona FFTL seidauk halo kongresu, AAF-TL halo uluk fali kongresu tanba Aniceto Berlelo hakarak dada kongresu AAF-TL para nia funsaun kontinua nafatin ba oin maski mandatu remata ona.
Reportajen: Augusto dos Santos