Ofisialmente Abertura Ba Treinamentu, Portu Taibesi Kontrata Jogador Estranjeiru Na’in Tolu

SAPNewsTL, Dili: Klube Porto Taibesi ofisialmente halo abertura ba treinamentu jogador sira hodi prepara ba Liga Timorense epoka 2022-2023, portantu Klube refere kontrata mos jogador estranjeiru nain tolu ne’ebe sei reforsa ekipa ne’e.

“Ohin ofisialmente treina jogador kuaze tuir hotu maibe ami sei hein jogador estranjeiru nain rua ka tolu ne’ebe aban sei to’o ita nia rai, jogador sira ba divizaun dahuluk Liga Timorense epoka 2023-2023 ami rejistu hotu ona maibe ohin konsulta tan ho treinador ne’ebe ami hotu konkorda ona ne’ebe ami sei rejistu iha orgaun LFTL iha loron aban”, Manajer klube Charles Guterres ba jornalista SAPNewsTL iha kampu futebol Taibesi, Dili kuarta (01/02/2023)

Charles hatutan, jogador sira ne’ebe rejistu ona klube ho forsa naton hodi fiar an no prontu kompete ho klube  zigante sira seluk iha divizaun dahuluk Liga Timorense epoka 2022-2023, sira optimista mantein nafatin ne’ebe sira fiar bainhira “Dewi Fortuna” fo sorte sira bele sai kampiaun tanba buat hotu mai husi sorte bainhira klube zigante sira ne’ebe ho jogador diak maibe “Dewi Fortuna” la fo sorte sira labele sai manan nain.

Iha fatin hanesan treinador klube Porto Taibesi Miro Bento hatete, sira ofisialmente treina jogador sira ne’ebe jogador barak foin atu joga iha divizaun dahuluk Liga Timorense epoka 2022-2023 no balu joga tiha divizaun dahuluk ona ne’ebe sira iha vontade boot tebes hodi kompete Liga Timorense epoka ne’e.

“Ohin ami ofisialmente treinu jogador sira hotu ba divizaun dahuluk Liga Timorense epoka 2022-2023, ha’u tenki fo fiar ba jogador sira mezmu la iha jogador ida ne’ebe estrela maibe bainhira hamutuk ami forte no ha’u nia jogador sira iha vontade boot tebes tanba hau nia jogador sira ne’e barak mak foin joga iha divizaun dahuluk no balun joga tiha ona maibe la famozu maibe bele fo motivasaun ba jogador sira seluk ami bele kompete iha Liga Timorense epoka ne’e”, tenik treinador

Treinador akresenta, sira mos kontrata jogador estranjeiru nain tolu ne’ebe joga iha mediu no avansadu tanba sira presiza jogador pozisaun sira hanesan ne’e tanba iha Timor-Leste susar los atu hetan avansadu klaran (murni), nia estratejia jogu sei hare’e ba jogador sira nia espiritu jogu tanba iha Timor-Leste estratejia no formasaun treinador sira iha klube hanesan deit maibe nia sei motiva nia jogador sira oinsa iha jogu bele sai manan nain.

“Durante ami klube nia failansu sempre  iha baliza no defeza tanba dala barak sira mak fo oportunidade ba adversariu hodi marka golu, ida ne’e ami tenta para hadia no jogador estranjeiru ne’ebe ami kontratu ne’e sira mai tenki halo buat ruma ba klube selae ba iha jogu jornada dala tolu ka haat ami bele hapara sira nia kontratu tanba estranjeiru tiha mak la halo buat ida ba ami nia ekipa hanesan deit maibe ha’u fiar agora sira mai hamutuk ami ho adeptu sira suporta sira para sai diak , ami fiar katak sira sei halo buat ruma tanba durante ami nia klube kontratu jogador estranjeiru sempre halo mudansa iha ami nia klube”, Miro Dehan

Miro informa, iha epoka ne’e sira la kontratu jogador husi selesaun nasional Timor-Leste tanba bainhira kontratu sira, sira sempre husu salariu ne’ebe boot tan ne’e sira la iha kbi’it no jogador sira atu rejistu iha orgaun LFTL minimu jogador nain-20 masimu nain-25.

Enkuantu, Liga Timorense epoka 2022-2023 sei realiza iha loron 17 fulan ne’e, agora daudaun klube barak mak regista ona iha no prepara hodi kompete iha liga refere

Reportajen: Augusto dos Santos