Vizita Sede SAPNewsTL, SEKOMS Orgullu Ho Ispíritu Voluntarizmu & Komitmentu Forte

SAPNewsTL, Dili : Sekretariu Estadu Komununikasaun Sosial {SEKOMS} Mericio Juvinal dos Reis “AKARA” kuarta-feira orseik hala’o vizita korteziu ba Sede  Media SAPNewsTL nia servisu fatin, objetivu husi vizita ne’e hodi haree kondisaun atual Media SAPNewsTL no servisu Jornalista sira nian iha Media refere.

Iha vizitasaun ne’e,  SEKOMS Mericio Juvinal dos Reis “AKARA” haktuir, Nia sente orgulluza no admira tanba Jovens Estudante sira bele hari’i media rasik ho boa vontade no komitmentu hakarak kontribui ba desenvolvimentu komunikasaun sosial

“Ha’u orgolho ho media SAPNewsTL sira nia inisiativa nu’udar jovens, Estudante ne’ebe ho komitmentu forte, esperitu voluntarismu ne’ebe mak makaas hodi halibur malu bele harii Media ida, ita hotu hatene  hari’i instituisaun ka media ida laos fasil maibe ita boot sira konsege hari’i duni, inspira ha’u katak Timor iha komitmentu forte iha espiritu makaas atu desenvolve nia rai liliu iha area komunikasaun, Maske iha fatin ne’ebe simples, dook husi estrada, difisil atu asesu maibe joven sira la hein deit tulun husi Governu mak hala’o aktividade maibe sira halo dadauk ona ho kondisaun ne’ebe simples maibe sira sai tilun, matan ba sidadaun sira”. SEKOMS Mericio Juvinal dos Reis “AKARA” iha intervista ho Media SAP News TL, Bekora, Dili, 01/02/2023

“Semana ida liu ba SAPNewsTL vizita ha’u iha hau nia edifisiu (Palasiu Guvernu), ha’u kontenti bele hetan vizita husi ita boot sira tanba imi iha inisiativa rasik buka dalan hasoru ha’u no iha momentu ne’eba ha’u husu estrutura  SAPNewsTL kona-ba edifisiu ka servisu fatin iha ne’ebe ? no sira hatan,  iha Bekora. ha’u hatan tanba imi vizita ona ha’u, ha’u mos hakarak vizita fila fali imi nune’e laos imi deit mak hatene ha’u nia servisu fatin maibe ha’u mos bele hatene imi nia servisu fatin, atu ita bele konhese malu, ha’u la imajina imi bele halo to’o iha faze ida ne’e”Nia dehan

Nia Hatutan, Timor Leste agora iha era dijitalizasaun, media dijital, hafoin media konvensional sira eziste, ohin loron iha mos jovens sira hari’i media oioin hodi kontribui no haklean sira nia kunhesimentu ba teknolojia dijitalizasaun no medernizasaun

“Agora ita hotu hatene antes Era Digital, Media konvensional sira eziste, iha Timor mos ita nia joven sira, estudante sira hari’i rasik media, ho kapasidade no rekursu ne’ebe iha limitasaun maibe sira halo . Agora iha Era Digital joven sira Timoroan sira aproveita tan hari’i media Online bar-barak ida ne’e esperitu ida diak, ema la hein tulun, la hein ema, sira hari’i daudauk depois maka buka apoiu, ida ne’e diak tenki manteim no kontinua”. Tenik Akara

Governante ne’e husu ba Media SAPNewsTL no media hotu hotu atu hariku liu tan kunhesimentu, aumenta numeru qualidade media iha Timor Leste hodi fo garantia ba liberdade imprensa no expressaun, garantia paz, demokrasia no direitus humanus liu husi kumpri kode etika jornalizmu, lei komunikasaun sosial

“Ha’u nia esperansa ba ita boot sira media hotu hotu mak ida ne’e, manteim esperitu ne’ebe mak forte, iha komitmentu ida ne’e hanesan rikusoin ida ne’ebe ita la bele sosa, kontinua servisu tuir kode etika jornalista sira nian servisu ho profisional hatudu ita boot sira nia matenenek sai matan,tilun,ibun ba ita nia sidadaun sira, hato’o lia los, informasaun ne’ebe kredivel, lolos ajuda sidadaun sira nune’e sira la bele rona lia falsu,lia bosok sira iha sosial media”.Nia tatoli

Entretantu, Presidente SAP News Timor Leste Clementino Braganca Machado fo agradese, apresia no orgullu ho SEKOMS Mericio Juvinal dos Reis “AKARA” ninia vizita ba edifisiu SAP News, tanba konsege to’o iha fatin ne’ebe dook husi estrada, foho leten, difisil asesu

“Ami nia apresiasaun no obrigadu ba buat hotu husi Sua Excelesia SEKOMS Mericio Juvinal dos Reis “AKARA” ninia presenza mai iha ami nia fatin ida simples, fatin simples ne’e, ita boot hafurak ho ita nia vizita, fatin ne’ebe tenki to’o hafoin hasai kosar no iis, ami orgullu, ami kompremetidu sei kontinua hametin liu tan ami nia ezistensia konta ho Sekretaria Estadu Komunikasaun Sosial no ema hotu ninia apoiu ideia no moral”. haktuir Presidente SAP News Timor Leste Clementino Braganca Machado iha nia diskursu

Presidente ne’e realsa, Media SAPNewsTL hari’i husi Joven sira, Estudante sira ne’ebe apoia husi Konseleiru Padre Mouzinho Pereira Lopes, Presidente Konsellu Nasional Islamiku Timor Leste Pascoal Sidik Lemorai no Engenheiru Armindo de Jesus, media ne’e hambriik ho vizaun atu atinje sosiedade Timor ida mais informativu, inspirativu, konstrutivu, edukativu, kritiku, analitiku no produtivu hodi hametin no haburas konstrusaun estadu de direitu no demokratiku

Enkuantu, iha vizita SEKOMS Mericio Juvinal dos Reis “AKARA” ne’e akompanha mos husi Gabinete SEKOMS, iha ne’ebe simu ho lian dadolin husi Lia nain SAPNewsTL hamutuk ho nia Jornalista Media nian kuaze haatnulu

Jornalista : Juvita Sarmento