OJE 2024 ! Guvernu Sei Prevê Billiaun 1.6
SAPNewsTL, Dili : Liu husi Reuniaun Konsellu Ministru ohin iha Palasiu Guvernu Segunda Feira ne’e, Konsellu Ministru (KM), delibera no aprova Orsamentu Jerál Estadu ba tinan 2024 (OJE), ho valór globál hamutuk dolar amerikanu billiaun 1,6.
Montante ida-ne’e reflete redusaun 18%, ekivale ba dolar amerikanu hamutuk millaun 360, kompara ho OJE tinan 2023.
Reuniaun Konsellu Ministru ne’e partisipa husi Primeiru Ministru Jose Alexandre Kayrala Xanana Gusmão, Vise Primeiru Ministru na’in rua, Ministru sira, Vise Ministru no Sekretariu Estadu sira
Iha sorumutu Konsellu Ministru tetu agregadu hamutuk biliaun $1,6 inklui dotasaun ida hamutuk $1.458.292.345, ba administrasaun sentrál hamutuk $81.707.655, ba seguransa sosiál hamutuk $60.000.000 destina ba Rejiaun Administrativa Espesiál Oekusi Ambenu. Valór ida-ne’e la inklui Fundu Rezerva Seguransa Sosiál nian, ho montante hamutuk $162.007.651.
Ho valór totál OJE tinan 2024, parsela husi $400.276.781 sei aloka ba saláriu no vensimentu, hodi reprezenta ba redusaun husi pursentu 14% iha relasaun ho tinan 2023. Ho valór $254.767.075 ba beins no servisus, hodi reflete diminuisaun husi 36% kompara ho OJE tinan 2023.
Ba despeza kapitál menór, prevee ho montante $247.320, enkuantu ba kapitál dezenvolvimentu milloens $177.606.384, ne’ebé koresponde ba redusaun husi pursentu 14% no 23%, ida-idak. Ikus liu, preve dotasaun ida $767.102.440 ba transferénsias públikas, ne’ebé maka reprezenta redusaun ida husi 13% kompara ho OJE tinan 2023.
Entidades públikas sei finaliza sira-nia proposta orsamentu, hodi bele analiza husi Komité Revizaun Orsamentál loron 23 Outubru to’o loron 9 fulan-novembru. Projetu Proposta Lei OJE tinan 2024 bele aprova husi KM to’o Loron 14 fulan-novembru tinan 2023 no sei entrega ba Parlamentu Nasional too loron 24 fulan-novembru.
Jornalista: Marcela Mery da Costa