Olimpiade Xadres Mundial 2022, Atleta TL Konkista Títulu FIDE

SAPNewsTL, Dili : Atleta na’in ualu konsege hamorin Timor-Leste nia naran iha Olimpiade Xadres ne’ebe realiza iha Chennai, Índia tanba sira konsege manan oponente sira mai husi nasaun forte sira ne’ebe atleta mane ultrapasa nasaun 19 husi 188 no feto hakat nasaun hitu husi nasaun 166.

“Ita nia atleta nain ualu feto haat mane haat   tuir olimpiade xadres mundial ne’ebe hala’o iha Chennai, Índia durante semana rua ho balun ne’ebe sira joga dala 11 ne’ebe ita nia atleta hatudu rezultadu diak tebes tanba ita nia atleta mane sira konsege ultrapasa nasaun 19 husi nasaun 188 no feto hakat nasaun hitu husi 166.” Tenik Prezidente Federasaun Xadres Timor-Leste (FXTL) Zeferino Tilman Viegas ba Jornalista SAPNews iha nia rezisdensia Manleuana, Díli, tersa (16/08).

Prezidente ne’e salienta, antes sai husi Timor-Leste nia duvida tanba atleta sira sei hasoru nasaun forte sira iha olimpiade xadres mundial ne’e maibe kontrariu akontese atleta sira hatudu rezultadu diak tebes

“Antes ita sai husi Timor-Leste ita iha duvida tanba ita nia atleta sira sei hasoru nasaun sira ne’ebe nia modalidade avansadu tebes tanba ita foin tinan ualu, ita nia federasaun xadres iha Timor-Leste estabele iha 2014 no  nasaun seluk  tinan atus ona existe ne’ebe ita dúvida fila ho rezultadu negativu maibe situasaun kontrariu akontese maibe ita nia atleta sira hatudu rezultadu diak tebes halo ita nia atleta nain tolu hetan titulu husi FIDE” dehan prezidente

Zeferino informa, rezultadu diak tebes halo atleta nain tolu hetan titulu husi FIDE tanba Timor-Leste hatudu progresu diak maski nasaun foun hasoru nasaun ne’ebe kompetetivu sira

“Rezultadu diak tebes ne’e halo Atleta Hélder Araújo hetan títulu FIDE Master tanba  ita  nia manan dala hitu no empata dala ida entaun ita nia hetan pontu 7,5 , ita nia Sonizia T. da Silva hetan títulu women candidate master husi FIDE tanba ita nia atleta  manan dala haat no empata dala rua ne’ebe hetan pontu 5, atleta Elfiana dos Santos  hetan titulu women candidate master husi FIDE tanba hetan pontu haat husi manan dala tolu empata dala rua maski Timor-Leste nasaun foun maibe konsege hatudu progresu diak iha nível mundial hodi hasoru nasaun ne’ebe kompetetivu tebes. Zeferino hateten

Entaun, atleta nain haat mak hetan titulu husi FIDE tanba  antes ne’e atleta Tito dos Reis mak konsege hetan titulu candidate master husi FIDE iha 2018 tanba Timor-Leste partisipa olimpiade xadres mundial iha tempu ne’eba maka atleta ne’e  hetan pontu 6,5 husi manan dala neen empata ida

Nia dehan, federasaun nia espetativa kiik tebes ne’ebe lori atleta ba para manan esperiénsia no hatudu nasaun Timor-Leste ba nasaun sira seluk

“Ami nia espetativa kiik tebes ne’ebe lori ita nia atleta Timoroan ba para manan esperiénsia no hatudu nasaun Timor-Leste ba nasaun sira seluk maibe ita nia atleta sira bele manan nasaun barak hodi hatudu  rezultadu pozitivu maski hasoru difikuldade antes ba partisipa eventu mundial ne’e tanba ami submete proposta partisipasaun olimpiade xadres mundial 2022 dala rua ba SEJD maibe rezeita hotu ne’ebe ami hetan apoiu ba billete aviaun, han hemu no hela fatin iha Chennai, Índia husi organizasaun mundial xadres (FIDE), hetan orsamentu 500 USD  husi kompania Orion Travel maibe kona ba viza, nesesidade viazen han hemu no toba iha nasaun balun tanba ultrapasa nasaun barak antes to’o nasaun Índia ne’e  ami empresta ne’ebe agora ami tenki buka dalan  atu selu ba ida ne’e”. tenik nia

Dosente UNTL ne’e hatete, sira nafatin halo planu anual estratejiku hatama ba SEJD hodi halo nafatin kompetisaun iha rai laran hodi prepara ba olimpiade xadres mundial iha futuru

‘Rezultadu iha tinan ne’e ami nafatin halo planu anual no estratejiku  hatama ba SEJD hodi halo nafatin kompetisaun iha rai-laran hodi prepara ita nia atleta sira  ba olimpiade xadres mundial ne’ebe realiza kada tinan rua iha nasaun estranjeiru sira ne’ebe  tinan 2024 iha Budapeste, Hungaria no tinan 2026 iha Uzbekistan maski ami hasoru obstakulu oi-oin maibe modalidade xadres lao nafatin”. nia afirma

Iha fatin hanesan atleta Hélder Araújo dehan, nia senti kontente no orgulllu tebes bele hetan pontu hitu ho balun (7,5) maski hasoru dezafiu barak

”Ha’u Kontente tebes tanba pessoalmente akumula pontu hitu ho balun (7.5) iha jogo ronde 11, maske hasoru desafio barak iha kuadru Xadrez nian ho oponente ne’ebé mai husi nasaun forte tebes maibe governu tenki tau matan ba atleta sira hamutuk ho federasaun ho seriu, Importante mak governu tenki tau matan, sériu ba halo investimentu no ema ida-idak mós tenki iha vontade ba aprende no husi rezultadu ne’ebé ohin ami hetan ne’e, sai nu’udar motivasaun ba xadrista hotu iha Timor “,  tenik Helder

Iha sorin seluk atleta Sonizia T. Da Silva hatete, nia sente kontente tanba konsege manan nasaun sira seluk hodi hetan titulu women candidate master husi FIDE

“Ha’u kontente tanba ami ba tuir kompetisaun olimpiade xadres mundial ne’e konsege manan nasaun sira seluk no hetan titulu women candidate master husi FIDE maski ami la hetan suporta husi governu ba eventu internasional ne’e maibe ami  nafatin iha vontade atu hatudu ita nia nasaun ba nasaun sira seluk iha mundu, ha’u prontu nafatin hodi treinu prepara diak liu tan ba kompetisaun internasional iha future”. Nia sublinha

Enkuantu, atleta ne’e mos husu  joven Timor-Leste atu aprende liu tan xadres hodi haboot modalidade ne’e nia naran tanba liu husi xadres hamorin Timor-Leste, atleta nain ualu ne’ebe partisipa olimpiade xadres mundial iha Chennai, Índia mak Helder Araújo, Cosme Guterres, Tito dos Reis, Marcos da Conceição, Zulmira A. Tilman, Elfiana dos Santos, Maria do Céu

Jornalista : Augusto dos Santos

Editor       : Ekipa Editorial