ONG Ba Futuru Realiza Konferénsia Ba Foinsa’e Sira Husi Lautem No Dili

SAPNewsTL,Dili: NGO Ba Futuru, realiza konferensia nasional ho tema “Joven Sai Embaixador Hodi Halo Mudansa Pozitivu”, Iha konferensia nasional NGO ba Futuru ne’e, Direktora Ezekutivu NGO ba Futuro Juliana de Oliveira Marçal hateten Konferensia Nasional Peacejam ne’e nu’udar eventu ida halibur foinsa’e sira ne’ebé mak hola parte ona iha programa ne’e, inspira aprendedor foinsa’e atu bele troka sira nia esperiensia no kuñesementu ba malu durante eventu konferensia ne’e rasik.

“NGO Ba Futuru, lori foin-sa’e sira, tantu envolve ona iha grupu ka individu sira hamutuk ema nain 85 ne’ebé mai husi munisípiu Lautem, Posto Adminitrativu Lautem no Luro no Munisipiu Dili iha Postu Administratvu Dom-Aleixo, Suco Comoro, Aldeia Golgota  hodi partisipa iha eventu ida ne’e”. Dehan Direktora Ezekutivu NGO ba Futuro Juliana de Oliveira Marçal iha nia diskursu, iha edfisiu ONG Ba Futuru, Sentru ba Dame, Raikotu-Comoro, Dili, 21/09/2022.

Direktora ne’e akresenta, Foin-sa’e sira ne’e mak envoive ona iha NGO Ba Futuru nia programa, inspira Foin-sa’e ba Mudansa husi projetu sira ne’ebé envolve foin-sa’e sira durante tinan 2022 nia laran.

“Durante periódu ne’e, foin-sa’e sira ne’e simu ona formasaun iha área abilidade moris nian, lideransa, haforsa ekonomia, abilidade teatru no kurrikulu PeaceJam no sira mós hetan ona akompañamentu másimu kada fulan husi NGO Ba Futuru nia ekipa ne’ebé maka servisu ona iha programa ne’e”. tenik nia Diretora

Ezekutivu ne’e hatutan, hafoin simu tiha formasaun, foin-sa’e sira husi komunidade Posto Adminitrativu Lautem no Luro kolabora hamutuk hodi hari’i jardin ba pås iha sira nia Suku, pinta fila fali moru iha sira nia sede Suku no Aldeia, kria fatin ba lixu nomos halo lutu ba fatin públiku balu iha sira nia komunidade.

Nia fundamenta tan, foinsa’e sira husi komunidade Aldeia Golgota ho total nain 25, hafoin simu tiha formasaun kona-ba Kurrikulu PeaceJam, sira kolabora hamutuk ho NGO Ba Futuru nia fasilitador hodi harii Peace Garden (Jardin ba Pás) iha NGO Ba Futuru nia edifisiu oin.

Entretantu, konferensia nasional hala’o durante loron 2, hahu husi loron 21 – 22 Setembru 2022  ne’ebé partisipa husi foinsa’e sira ne’ebé mai husi Munisipiu Lautem Postu Lautem no Luro  hamutuk nain 60, inklui mos Munisipiu Dili ne’ebé mai husi Postu Dom Aleixo hamutuk ema  na’in 25.

Direktora Ezekutivu NGO Ba Futuru ne’e mos agradese ba doador sira hanesan New Zealand, ChildFund Timor Leste, Agiamondo no Oaktree sira ne’ebé maka suporta ona programa ne’e. 

Enkuantu NGO ba Futuru mos servisu hamutuk ho parseiru sira hanesan, SEJD, CNJTL, PERMATIL, CODIVA,CNC,  Knua Juventude Fila Liman, no inklui mós individu no grupu foin-sa’e balun ba iha forum ne’e.

Jornalista : João Marito & Benezia dos Reis

Editor : Ekipa Editorial