Pakote Uniku, Januario Brito Eleitu Ba Prezidente FBATL 2023-2027

SAPNewsTL, Dili: Januario Da Silva Brito eleitu ba Prezidente Federasaun Boxe Amadora Timor-Leste (FBATL) ba periodu 2023-2027 tanba pakote uniku iha kongresu jeral Dalimak ho tema “Mai Ita Hamutuk Dezenvolve Boxe Amadora Ba futuru.

“Ha’u eleitu ona ba periodu 2023-2027, konfiansa ne’ebe mai husi assosisaun no klube sira hodi hili ha’u sai prezidente FBATL ha’u sei dezenvolve FBATL hodi kontinua prezidente anterior nian ne’ebe lori atleta hetan medalla osan metan ida iha Sea Games Filipina 2019, osan mutin ida no metan ida iha Sea Games Vietnam 2022, ha’u nia programa sei kontinua susesu ne’e no bele diak liu tan”, afirma prezidente eleitu FBATL Januario Da Silva Brito ba jornalista sira iha fatin kongresu edifisiu CONTL, Colmera, Dili sexta (13/01/2023).

Januario hatutan, presija buat barak, programa tuir mai buka dalan hetan treinador internasional, bukan dalan federasaun hetan fundu rasik husi organizasaun boxe internasional labele depende deit ba governu no buka dalan para hetan konfiansa husi emprezariu sira para ajuda fundu.

Iha fatin hanesan reprezentante SEJD Maria Luiza Monteiro hatete, ohin sira partisipa kongresu jeral FBATL hein katak sira hetan ema kualidade dezenvolve modalidade boxing tanba federasaun ne’e fo prestasaun ba nasaun

“Ohin ami partisipa kongresu FBATL ne’ebe sira hili fali estrutura foun para jere organizasaun ne’e, hein katak sira bele hetan ema kualidade para dezenvolve modalidade boxing ba futuru, tanba modalidade fo prestasaun ba ita nia rai liu husi Sea Games tinan ne’e hanesan tinan hira ba kotuk”, tenik Maria

Maria afirma, kongresu ne’e rasik SEJD la fo apoiu orsamentu tanba FBATL submete proposta ba governu iha tempu ne’e ezekusaun orsamentu governu nia data liu tiha ona tanba ezekusaun orsamentu governu to’o deit iha fulan dezembru maibe SEJD sei apoiu nafatin ho moral ba iha FUTURU.

Iha sorin seluk vise-prezidente dahuluk CDTL Inocêncio Araújo dehan, CDTL mai partisipa kongresu CDTL para fo lia menon hodi dezenvolve nafatin FBATL tanba potensia iha Timor-Leste no prezidente sesante rezigna an.

“Ohin CDTL mai partisipa kongresu jeral FBATL nian, tanba prezidente sesante rezigna an sira la iha ona lider atu lidera sira, ohin mak oportunidade diak sira hili fali prezidente foun hodi harii sira nia organizasaun metin, haklaken atividade boxing hodi harii asosisaun sira munisipiu 14 inklui RAEOA, ita hatene modalidade boxing potensia ba Timor-Leste atu hetan prestasaun iha kompetisaun nasional no internasional tanba ne’e ohin ami mai fo lia menon ba sira tinan ne’e CDTL iha programa importante ba federasaun depostivu sira liuliu boxing”, tenik Inocêncio

Vise-prezidente ne’e akresenta, sira hakarak promove federasaun boxing tanba iha Timor-Leste joven sira nia espiritu fighting ne’e makaas hodi realiza kompetisaun involve joven sira hotu ne’ebe buka dalan ho parseiru sira hotu para eleva boxista sira nia prestasaun ba futuru.

Entretantu estrutura ne’ebe eleitu iha kongresu FBATL ba periodu 2023-2023 maka prezidente Januario da Silva Brito, vise prezidente dahuluk João Jose Fernandes, vise prezidente Daruak Laud, sekretariu jeral Rogerio Amaral Soares, vise sekretariu jeral Nelson Talise, tezoreira Rocky Marciano Nahak no sekretaria Maria Casandra Xavier no kongresu partisipa husi reprezentante asosisaun munisipiu sira mak Ermera, Manatuto, Ainaro, Same, Aileu, Oe-cusse, Baucau, Viqueque, Lautem no Bobonaro no klube sira maka Oriental Boxing, Benfica Boxing, EL Matador boxing, Mascarenhas Boxing, Fomento Boxing, Colmera boxing, Bairo-Pite Boxing, MM BC Boxing, Bidau Masau Boxing, União Bidau Boxing, BTB Boxing, Scorpion Boxing, ABBA Boxing, Rumbia Boxing, Lorico Boxing, Laulara Boxing, Dili Boxing, Farol Boxing, DLBC Boxing no Forsa Boxing.

Reportajen: Augusto dos Santos