Papa Francisco Apresia TL Promove Dame no Toleránsia
Roma, SAPNewsTL : Iha ámbitu Sorumutu, Santu Padre Francisco agradese ba dadalia badak ho enviadu Espesiál Extraordináriu Prezidente Repúblika, Kay Rala Xanana Gusmão, hodi deskuti assuntu kona-ba rezolusaun konflitu iha mundu hodi hametin paz no hadi’a povu nia moris.
Enviadu Espesial Kay Rala Xanana Gusmão orgullu ho mensajem husi Papa Francisco ba povu Timor-Leste kona-ba prosesu dezenvolvimentu nasionál no toleránsia iha sosiedade durante ukun aan, iha tinan 20 nia laran.
“Ha’u agradese bele hasoru sua-sentidade Papa Francisco, nia agradese tebes hodi ha’u fó apresu boot tebes ba Timor-Leste, Prezidente no povu tomak, nune’e hodi Prezidente Repúblika nia naran, ha’u fó hatene katak, ita tuir hela atividade sua-santidade ninian, liu-liu kona-ba atu rezolve funu no buka meius hapara tiha funu iha Ukrania ho rai seluk agora dadaun ne’e,” tenik Xanana hafoin hasoru Papa, iha Palasiu Apostoliku Santa Sé Roma, 25/08/2022.
Enviadu Espesial ne’e mos introduz ba Santu Padre kona-ba, Povu Timor-Leste akompaña atividade líder igreija ne’e, liu-liu vizita ba Irake, hodi halo aprosimasaun ho relijiaun Islámika no esforsu ne’e nu’udar aktu exemplar.
Nia hatutan, Prezidente Ramos-Horta agradese ba Papa Fransisco ne’ebé temi no promove naran Timor-Leste ba mundu tomak, tanba implementa projetu rezolusaun númeru 93/V(4ª) kona-ba fraternidade umana
“Ha’u temi mós kona-ba fraternidade umana hodi dehan katak, iha Timor-Leste ita hahú tiha ona programa hirak ne’e, iha fulan sira ne’e no sei hatudu tan iha fulan setembru 2022, no sei buka halo tinan-tinan hodi nune’e, grupu sira hodi religaun oin-oin, Katoliku, Kristaun, Musulmanu, Hindu no Konfusiu hodi bele ba apresenta iha Jakarta, nune’e motiva religaun sira seluk bele iha hanoin hadomi malu, respeita malu no kria dame,” nia akresenta
Timor-Leste nu’udar pais ki’ik ida ne’ebé maioria Katolika, sai exemplu hodi promove nafatin toleransia entre relijiaun no liberdade relijiaun iha nasaun sira
Iha enkontru kuaze oras ida ne’e, Papa Francisco defende atu kontinua programa fraternidade umana iha pais hotu, atu hapara ona funu no apresia esforsu Timor-Leste hodi ajuda Papa nia programa.
“Amu Papa iha vontade liu, ita sente tebes nia kontente simu delegasaun ofisiál hosi Timor-Leste ne’ebé reprezenta Prezidente. Tanba ne’e, ha’u kontente no ha’u dehan ba nia, povu tomak sei reza ba ita boot nia saúde, tanba saída maka Papa halo, hodi ko’alia hasoru funu, ko’alia kona-ba pas, rekonsiliasaun no ko’alia dame entre religaun, buat hirak ne’e presiza korajen boot hanesan Papa Francisco iha vizaun boot tebes no hanoin luan haree ba mundu ohin loron,” Xanana subliha.
Jornalista : Vinsensius Saldanha Morais De Araujo