PD Apresia IGE Normaliza Estrada Leorema, Kalohan Husu Atensaun MJ Iha Notariadu
SAPNewsTL, Dili : Deputadu Bankada Partidu Demokrátiku Antonio da Conceição iha nia intervensaun hato’o apresiasaun ba Prezidente Institutu Gestão de Ekipamentu (IGE) tanba bele normaliza Estrada diresaun Leorema Postu Administrativu Bazartete Munispiu Likisa ne’ebe hetan estragus foin lailais ne’e
“Ha’u-nia pedidu deit, maske ho ha’u-nia mensajen simples deit nia hola ona intervensaun ba estrada ne’ebé naksobu iha fulan ne’e nia-laran husi Leorema mai Bazartete tanba presiza Ambulánsia atu lori ema moras sira i Sra. Prezidente fó duni resposta”. Tenik Deputadu Antonio da Conceição iha Uma Fukun PN, 12/07/2022
Deputadu Bankada PD ne’e hakarak hato’o agradesimentu liu husi Sr. Ministru no Prezidente Institutu Gestão de Ekipamentu (IGE)
“Populasaun atu nafatin kolabora ho servisu sira ne’ebé mak governu tuun halo daudaun hanesan estrada ne’e, hodi labele halo impedimentu tanba buat sira ne’e hotu di’ak ba ita, bainhira presiza ita husu, kuandu iha ona intervensaun presiza mós povu tenke fó ninia apoiu, ne’ebé kafé sira mak iha dalan ne’e mós lalika ba insisti atu ganti rugi tanba estrada aat tiha ona, presiza Estrada, governu halo ida ne’e tenke apoiu ba”. Dehan nia
Nia haforsa, Institutu Gestão de Ekipamentu (IGE) hatan ona dalan ida ba Ermera ne’e rai monu, ai ne’ebé satan dalan husi Glenu ba Ermera Lama ninian, karik mós halo deit intervensaun ida normaliza deit dalan ne’e di’ak ona atu nune’e povu bele halo, maske seidauk alkatraun pelu menus normalizasaun ne’e importante.
Iha parte seluk, Nia foti kestaun ida horseik trata pasaporte iha notariadu, iha servisu notariadu ne’e ita bele haree dehan katak kuaze 24 oras ne’e sira hola prestasaun servisu iha ne’eba, ema nakonu iha fatin ne’eba, hotu-hotu ema barak tebes atu sertidaun RDTL, ba trata bilhete identidade depoiz mós pasaporte, la iha espasu ne’ebé mak sufisiente ba sira, maibé mós la iha ar kondisionadu ruma ne’ebé mak iha ne’eba atu bele apoiu netik sira-nia servisu.
Deputadu bankada PD ne’e mós husu ba ministériu justisa bele fasilita sira fatin sira ne’ebé fó atendimentu públiku ne’e ho didi’ak hodi bele posibilita netik servisu ne’e tanba ema hotu-hotu ba husu sira-nia prestasaun servisu ba ita.
“Ita tenke louva funsionáriu sira-nia servisu, Ha’u hanoin buat ne’ebé sira fó dadauk ne’e di’ak tebes, maibé Ha’u mós husu entidade sira ne’ebé karik ba ne’e labele impoin demais ita-nia podér ne’e iha ne’eba, ita-nia pozisaun ne’ebé mak ita iha atu ba obriga funsionáriu simples oan sira ne’e fó tratamentu espesiál ba ita hotu, ita mós tenke hanoin katak populasaun mak ba hamriik no hein iha ne’eba, ita labele hanoin dehan entidade ruma Ha’u-nian ne’e mak importante liu”. Hatete Deputadu Kalohan
Jornalista : Eduardo Moniz
Editor : SAPNewsTL