Pe. Mariano : Jesus Nunka Kolen Hodi Perdua, Moris Hias Ona

Imajem : Pe. Mariano Quintão do Rego halo Omilia Sabadu Aleluia nian ba sarani sira iha Surikmas-Dili, 30/03/2024.

SAPNewsTL, Dili- Iha selebrasaun Sábadu Aleluia, Pe. Mariano Quintão do Rego hateten maromak nunka kolen hodi fo perdua ba ema hotu maske dala barak ema sempre loko an no la fiel ba Maromak, iha festa vizilha paskal ne’e nia moris hias ona husi mate.

Iha Omilia Pe. Mariano do Rego hateten, Vizilha Paskal husi api trinum paskal  signifika hader hodi hasoru Jesus Kristu nia moris hias ne’ebe atu mai dadaun ona iha rai hun mutin.

“Liafuan Vizilha mai husi lian Vizileiru katak, Hahalok ka hader matan moris neon nain nu’udar biban importante ida atu labele dukur, tanba buat ruma importante atu mosu mai dadaun”.

 

“Nune’e sentidu husi Vizilha paskal nu’udar api trinum paskal  signifika hader hodi hasoru jesus Kristu nia moris hias ne’ebe atu to’o dadaun mai iha rai hun mutin, fiar na’in ida-idak sei hein nafatin ho fiar to’o kristu hit an hikas mai ba dala rua, nune’e mos ita fiar nain sira hafoun ita nia promesa Batismal ” Dehan Pe. Mariano Quintão do rego iha ninia Omilia Sabadu Aleluia, Kapela Surikmas-Dili, 30/03/2024.

Pe. Mariano aumenta tan katak, Amu Papa Bento XVl hateten iha vizilha paskal  atu hafoun fali Jesus Kristu ninia moris hias no  iha leitura novu testamentu nian haklaken hodi inspira konaba Maromak mak kriador lalehan ho rai no buat hotu.

“Amu Papa Bento XVI hateten iha Vizilha Paskal  hafoun jesus Kristu nia moris hias ne’ebe nu’udar roman maromak nian, katak haroman mundu nia Historia tomak, no roman ne’e mesak deit mak ita nai Jesus Kristu, nia roman moos liu fali roman baibain ne’ebe ita hare hetan, maibe nia haroman ita to’o ita nia fuan laran”. Nia dehan

Padre selebrante ne’e hatutan, iha leitura ne’ebe foti husi Livru Novu Testamentu nian katak haklaken hodi inspira kona-ba maromak mak kriador lalehan ho rai no buat hotu inklui ema.

 

“Maromak mak kria buat hotu inklui ita ema, Maromak nu’udar nain ba kriatura hotu no Maromak halo aliansa ho ita ema maske ita ema loko an, la fiel, maibe Maromak sempre fiel no nunka kolen atu perdua ita hodi restaura fali nia aliansa”.

“Aliansa ne’ebe tuan ne’e ikus mai realiza definitivamente no perfeitamente iha ninia oan mane mesak Jesus Kristu liu husi nia terus,mate no moris hias, Kristu ne’ebe moris hias ona husi mate sira leet no nia sei la mate tan”. Padre Mariano do Rego sublinha

Selebrasaun ne’e hetan partisipasaun maksimu husi Sarani  iha area Surikmas, misa refere la’o ho diak no hakmatek tanba hetan mos seguransa husi parte PNTL munisipiu Dili.

Jornalista : Antonina Lopes Sarmento