PR Horta Apresia Servisu Konsuladu Jerál TL Iha Bali

Bali : Prezidente Repúblika, José Ramos-Horta agradese servisu husi Konsuladu Jerál Timor-Leste bá Bali-Indonezia ne’ebé la’o di’ak hodi reprezenta imajen Timor-Leste iha Indonezia.

“Ha’u foin primeira vez mak mai vizita, haree imi nia fatin di’ak tebes, imi kontinua servisu diak nafatin ho autoridade Indonesia,” Tenik Xefe Estadu iha vizita dahuluk durante  tranzita iha Bali, antes atu hala’o vizita Estadu ba Portugal”. Dehan PR Ramos Hora iha Bali, 29/10/2022

Iha vizita ne’e, Xefe Estadu haré direita servisu Konsul Jerál Timor-Leste ba Bali, Aleixo da Silva ho Diplomata, Hugo Imanuel Garcia no funsionáriu na’in-22 ho feto nain haat (4) ne’ebé durante tinan 16 ona hala’o servisu protokular no reprezenta imajen Timor-Leste hodi hametin lasu kooperasaun iha área oin-oin ho Governu Indonesia.

Vizita Xefe Estadu akompaña hosi Ministra Negosiu Estranjerus no Kooperasaun (MNEK), Adalijiza Albertina Xavier Reis Magno, Embaixador Timor-Leste ba Jakarta, Filomeno Aleixo no Assesor Relasaun Internasionál Prezidensia Repúblika, Nelson Santos no Ivo Valente.

Hafoin enkontru, Xefe Estadu mós rona aprezentasaun husi Konsúl Jerál iha Bali, Aleixo da Silva no agradese vizita Xefe Estadu iha Konsuladu.

Edifisiu Konsuladu Jerál Timor-Leste iha Bali ho andar rua no sala servisu fatin neen (6) no fatin enkontru ne’e Governu Timor-Leste sosa iha tinan 2013 liuba.

Edifisiu ne’e hetan vizita ona hosi Lider Nasional, Kay Rala Xanana Gusmão iha loron 20 Agostu 2022, foin dahuluk hetan vizita tan hosi PR Ramos-Horta, Prezidente PN, Aniceto Guterres no Ministra Negosiu Estranjerus no Kooperasaun, Adaljiza Magno.

Durante iha Bali, Prezidente Ramos-Horta mós hasoru malu mós ho Prezidente Parlamentu Nasional, Aniceto Loinguinhos Guterres ne’ebé foin hala’o vizita servisu iha Portugal.

Enkuantu, Prezidente Repúblika Ramos-Horta no Prezidente PN Aniceto atualiza informasaun ba malu, kona-ba vizita bá Portugal no Prezidente Aniceto informa mós ninia vizita ho delegasaun Parlamentu Nasional hodi partisipa  Sesaun Solene XI Asembleia  Parlamentar CPLP ne’ebé hala’o iha Portugal hosi loron 24 too 26 Outobru 2022.

Jornalista : Vinsensius Saldanha