KBP Orgullu Governu Planu Hari’i Sentru Kardiolojia

Dili : Diretor Klinika Bairo Pite(KBP), sente orgullu planu governu liu husi Ministériu Saude (MS), melhora fasilidade kardiolojia, Tuir diretor klinika Bairo Pite hateten katak planu governu hodi melhora makina saude iha area espesialidade kardiolojia ne’e kapas tebes tanba antes ne’e governu haruka pasiente sira ba halo tratamentu iha nasaun seluk

“Planu governu liu husi MS melhoria fasilidade saúde ba area espesialidade hanesan kardiolojia ha’u hanoin kapas tebes, tanba ita haree kada tinan governu sempre haruka pasiente moras fuan ba rai li’ur, hodi hala’o tratamentu ba operasaun fuan, no ita nia governu tenke lakon osan ne’ebé boot atu transfere ita nia pasiente sira, maibé agora se ita nia governu hanoin no mellora tan fasilidade”, Dehan Diretor Klinika Bairru  Pite  Inacio dos Santos ba jornalista iha Fatin klinika bairru Pite,Kuarta- Feira(26/10/22)

Nia hatutan, governu presija melhoria fasilidade sira atu nune’e  bele utiliza fali tanba fatin barak mak governu abandona tan deit rekursu la iha atu utiliza

“Governu tenke haree no prepara didi’ak ita nia rekursu, para ita nia fasilidade ne’e labele soe de’it, ita hare iha Timor-Leste fatin barak mak governu kria fasilidade, no tan de’it rekursu la iha atu utiliza fatin sira ne’e soe de’it, ne’e la’os iha MS nian de’it, maibe kuaze fatin barak iha lina ministeriu hanesan, governu iha planu di’ak atu iha sentru ba kardiolojia, bele mos kria sentru ba kankru, inklui tratamentu sira ne’ebe ita sempre dezloka ba rai li’ur, duke governu lakon osan ne’ebé boot ba moras sira ne’e, di’ak liu governu rai osan ne’ebe boot no prepara fasilidade no rekursu ne’ebe di’ak” tenik nia

Nia haktuir, governu tenke kria rekursu umanu no fasilidade diagnostiku la bele kria fasilidade deit tanba sira sei la halo buat ida

“Ami nia rekomenda governu la bele kria fasilidade de’it tenke kria mós rekursu umanu, fasilidade diagnostiku no la bele fasilidade konstrusaun de’it, ne’e ami sei labele halo buat ida, ne’ebe ami  husu governu kria planu ba hari’i fasilidade ho di’ak, atu utiliza ba ita nia populasaun sira ne’ebé presiza tebes”.Nia sublina

Diretor ne’e salienta katak produtu kímiku ne’ebe konsumu halo moras fuan komesa aumenta tanba ne’e klinika no sentru saude sira presija médiku espesializada iha area sira ne’e hodi nune’e bele trata pasiente sira

“Ita Timor numeru ba moras fuan komesa aumenta, tanba hahan ne’ebe ita konsumu ne’e barak importa husi rai li’ur,  nune’e ita tenke iha médiku espesializada iha area sira ne’ebe ita presiza duke ita haruka ba rai li’ur, no kada tinan governu tenke hasai osan besik millaun 10, hodi dezloka ita nia pasiente sira ba rai li’ur, atu halo tratamentu”. Nia esplika

Nia esplika banhira governu investe didiak iha MS no fasilidade kompletu sira la presija tan doutor espesialidade husi nasaun seluk hodi governu lakon tan osan

“Osan ne’e investe didi’ak, iha ita nia nasaun fiar katak, tinan 10 ka 20 mai ita nia fasilidade kompletu, no ita sei la presiza tan doutor espesialista husi nasaun seluk, ita nia populasaun ne’ebe hetan moras fuan ka kankru ita bele halo tratamentu rasik iha ita nia nasaun Timor-Leste. “Nia informa

Nia dehan tan katak mediku Timor oan espalha barak maibe governu la kria fasilidade no rekursu ne’ebe mak diak ba sira

“Ita labele haree ba kbiit to’o ou la to’o ne’e mak dala ruma ita nia governu sempre dehan nasaun Timor-Leste sei ki’ik ka labarik, no bainhira mak atu adultu, no labele dehan Timor oan se dauk iha kapasidade tomak, tanba ita iha médiku rihun ona, no agora ita iha haree iha Dili laran, médiku barak mak espalla ba mai, la iha kampu servisu ba sira, no oinsa governu atu haree ba médiku jeral sira hodi kapasita, kria fasilidade no rekursu ne’ebe di’ak ba sira”. Hakotu Nia

Jornalista  : Antonio Tilman

Editor        : Ekipa Editorial