PR Horta Konsidera Investe Iha Intelijénsia Artifisiál Importante Ba TL

SAPNewsTL, LISBOA : Prezidente Repúblika, José Ramos Horta akompaña hosi  Ministra Negosiu Estranjerus no Kooperasaun,  Adaljiza Magno no Embaixadora Timor-Leste bá Portugal, Isabel Guterres iha loron 1 Novembru 2022, partisipa abertura konferensia teknologia, empreendedorizmu, Websummit ba dala-22 iha Lisboa, Portugal.

Xefe Estadu Ramos-Horta konsidera,  eventu teknolójiku ne’e, importante liu iha mundu, ho partisipante hosi ema rihun 70.000 mai hosi nasaun 165 no expositór na’in- 2630 no investidor no ema riku boot sira na’in- 1,120 no orador 1000 liu.

“Ohin ha’u mai haree de’it, abertura konferensia teknologia, empreendedorismu Websummit ba dala 22  ne’ebé ema rihun 70.000 partisipa iha ne’e, ha’u koñese ema lubuk ida, investidór  ho osan boot  ne’ebé ha’u ko’alia ba sira kona-ba oinsa Timor-Leste sai hanesan web regionál ida, ita tenki investe ba digitalizasaun  teknologia  no intelijénsia artifisiál, tanba Timor iha kualidade atu hola parte ho kabu submarinu ne’ebé sei dada ba Timor-Leste,” haktuir Xefe Estadu.

Tuir Xefe Estadu, bainhira Timor-Leste investe makas iha teknologia digitál, bele lori Timor-Leste hametin mos nia parseira ho nasaun belun sira iha mundu tomak, liu-liu país sira iha regiaun besik malu iha kontinente Ázia.

“Ha’u mai iha ne’e sei ko’alia ho sira hakarak dada sira riku boot no investidor boot bele ba Timor investe iha ne’eba no sira hotu- hotu tenki koñese Timor no bá Timor hodi halo vizita no haree oportunidade negosiu iha Timor-Leste,” dehan PR.

PR Horta elogia konferensia websummit ba dala 22 ne’ebé Estadu Portugal halo hametin mos kooperasaun ho nasaun tomak iha mundu hodi hola parte iha konfrensia ne’e.

Konferénsia ida ne’e foka ba teknolojia internet, teknolojia foin mosu no benefisiu husi kapitalizmu ne’ebé Timor-Leste presiza liu, atu akompaña no komprende iha dezenvolvimentu iha nível mundiál.

Timor-Leste, maske ho populasaun porsentu 60 hanesan joven, la bele sees husi dezenvolvimentu teknolójiku liu-liu, relasiona ho intelijénsia artifisiál.

Enkuantu, iha loron, 3 Novembru, PR Jose Ramos Horta sai Orador Prinsipal reprezenta Timor-Leste hato’o nia palestra ba ema hotu iha mundu kona-ba pozisaun Timor-Leste, hola parte iha konferensia websummit ba dala 22 no vizita paviliaun hodi haree hikas ekipamentu teknologia modernu ne’ebé ejiste iha mundu tomak.

Jornalista  : Vinsensius Saldanha

Editor        : Ekipa Editorial