PR Horta No PM Taur Lansa Sensus 2022, Guvernu Presiza Informasaun Lolos

SAPNewsTL, DilI: Prezidente Repúblika José Ramos Manuel Horta no Primeiru Ministru Taur Matan Ruak  halo Lansamentu Nasional Sensus Uma Kain Tinan 2022, objetivu husi sensus uma kain ne’e atu hatene dadus kredivel no lolos, nune’e guvernu no parseiru desenvolvimentu sira bele implementa programa tuir realidade social no ekonomia

Prezidente Repúblika José Manuel Ramos Horta haktuir sensus uma kain ne’e hanesan baze ida ba governu no parseiru Internasional sira.

“Ita halo sensu, la iha rai ida iha mundu ke la halo ida ne’e, sensu baze importante tebes ba governu ho ita hotu nia parseiru International sira akadémiku no ba Jornalista, estudante sira hatene lolos retratu sosial, humanu politiku rai ne’e nian, fo baze para governu bele halo planeia fiskalizasaun didi’ak fo resposta ba dezafiu ne’ebé rai ne’e  infrenta. Dehan Prezidente Répúblika ba Jornalista sira iha CCD Caicoli-Dili, Segunda-Feira, 15/08/2022.

Xefe Estadu ne’e mos husu ba Autoridade lokal sira hodi kontribui no partisipa iha programa ida ne’e.

“Ha’u apela ba Xefe Aldeia, Xefe Suku, no Prezidente Munisipiu kontribui halo mobilizasaun, sensibilizasaun hotu-hotu partisipa, ita hotu-hotu kontribui ho dadus lolos, Sensus ida ne’e atu deside ba ema ida-idak para governu bele haree lolos oinsa atu ajuda iha área politika desenvolvimentu hahú kedas ho kosok oan sira, Inan sira,  Adultu to’o Ferik Katuas sira”. Tenik Prezidente

Entretantu, Aman ba nasaun ne’e akresenta, atu hadia realidade social no ekonomia guvernu no parseiru internasionál sira presiza hatene klaru real ne’e be iha, protantu atu adere ba Asean presiza fornese dadus ne’ebe los no kredivél 100%

Iha Fatin hanesan  Ministru Finansa hanesan mos  Vise Prezidente Rui Gomes hateten Sensus Uma kain Ba Tinan 2022 sei hahú iha loron 4 fulan setembru to’o loron 5 Fulan Outubru

“Hahú hosi loron 4 Fulan Setembru to’o Loron 5 Fulan Outubru ita sei halo sensu uma kain populasaun 2022 iha teritoriu Laran, ita realiza ona sensu populasaun  uma kain iha 2004-2010 no 2015 sensu populasaun, kada tinan 5 ita halo ho objektivu atu rekolla informasaun atu hatene lolos Estrutura populasaun to’o iha nivel Aldeia no Suku”. Hatete Ministru Rui Gomes iha nia Diskursu

Governante ne’e Populasaun iha Postu Adiministrativu ida ne’ebé kosok oan no labarik sira barak liu, politika publika tenke oreinta ba oinsa hari’i krese ka pre-Eskolar, kuandu iha Postu Administrativu ruma ema ferik katuas barak liu entaun politka ne’e sei oreinta makaas liu iha area fasilidade ka tau matan ba populasaun sira ne’ebe idade ona.

“Prioridade dezenvolvimentu mak ema atu atingi moris diak no progresu mak kapital humanu sai nu’udar kapital importante liu hotu, ita mos presiza iha informasaun lolos no aktual kona-ba ita nia sosiedade iha nivel lokal to’o iha nivel Nasional.” Nia afirma

Enkuantu, Tuir planu governu realiza sensus ne’e iha tinan 2020 liu ba, maibe tanba governu la’o de’it ho orsamentu Duadesimu no iha 2021 tama covid19 entaun la konsege realiza aktividade sensus

Jornalista : Antonio Tilman

Editor       : Luis Pailofo