Forma Futuru Lideransa Kualidade, Vinsensio : Joven Prepara Joven Ba Desenvolvimentu

Imajen Intrevista Prezidente Komisaun Organizadora Vencesio Manuel José Guterres iha Kampus Central UNTL, Domingu,2/10/2022

SAPNewsTL, Dili: iha loron dahuluk semana nian ida ne’e, Assosisaun Klibur Roman (KR) organiza  seminariu Publiku ho tema “Joven Milenial Foinsa’e Futuru Lideransa Kualidade”, objetivu husi seminariu ne’e atu fanun, inspira no eduka foinsa’e sira, oinsa foinsa’e sira bele prepara nia an liu husi hadia no desenvolve sira nia kunhesimentu no kapasidade lideransa, nune’e bele hatene defende nia nasaun tuir prinsipiu no valor lideransa nian

Aktividade ida ne’e ko’alia kona-ba lideransa milenial tanba hanesan jerasaun foun presiza eleva   kuinesimentu hodi dezenvolve rai ida ne’e, responzabilidade ba oin, oinsa atu kapasita no eleva kuinesimentu juventude ida-idak nian iha parte lideransa nian.

“Ita haree Problema barak mak akontese iha mundu tanba faillansu iha lideransa, povu balun sei terus no mukit, ne’e kestaun lideransa nian, iha Semináriu ida ne’e ita fo fanun ba joven sira atu hanoin hikas fali oinsa ho joven sira uluk no agora, joven agora tenki hakonu an ho espiritu responsabilidade iha vida loron-loron nian”. Tenik Prezidente  Komisaun Organizadora Vencensio Manuel José Guterres  iha  Kampus Central UNTL, Domingu,2/10/2022.

Prezidente Komisaun ne’e Informa, seminariu ne’e partisipa husi estudante universitariu sira hanesan UNTL, UNPAZ, UNDIL no UNITAL husi Departamentu siénsia sosial, saude no edukasaun.

Vencensiu hatutan, sira sei kontinua habelar aktivdade ida ne’e ba joven sira to’o iha nivel Munisipiu sira.

“Ita ko’alia kona-ba lideransa milenial ita tenki haree liu ba iha joven sira iha Timor ne’e, ita presiza habelar nafatin seminário sira hanesan ne’e liu husi edukasaun popular maibé la’os iha Dili de’it, ami sei lori to’o Munisipiu sira hotu”. Nia informa

Nia  mos husu ba joven sira  hotu atu labele hamate espiritu de aprende, espiritu voluntariu, espiritu servi ema seluk maibe kontinua aprende no aprende liu tan hodi hasa’e kuinesimentu, aumenta kapasidade no hadia atetude hodi prepara an, nune’e bele fo garantia ba dezenvolvimentu nasaun ne’ebe nakonu ho paz, amizade no estabilidade.

Enkuantu, Seminariu ne’e partisipa husi orador nain rua ma ka hanesan Prezidente Movimentu Foinsa’e Atsabe Igitro dos Santos no Prezidente SAP News Timor Leste Clementino Bragancha Machado, iha ne’ebe hetan partisipasaun maksimu husi estudante universitariu sira kuaze haatnulu

Jornalista: Antonio Tilman & Absalaun da Costa