SEJD Aprova Osamentu Rihun 50,000 USD Ba Liga Voleibol 2022
SAPNewsTL,Dili: Sekretáriu Estadu Juventude Desportu (SEJD) aprova orsamentu ho montante 50,000 USD ba Federasaun Voleibol Timor Leste (FVTL) hodi realiza liga voleibol 2022.
“Proposta ba liga voleibol epoka 2022 ami avalia ona no ha’u aprova tiha ona orsamentu 50,000 USD ne’ebé ami iha diskusaun ho FVTL, oinsa atu estimula fali partisipante ema lokal sira aumenta, entaun mekanismu husi ita nia federasaun mak atu ajusta oituan oinsa halo apuramentu husi baze atu nune’e fo espasu ba jogador sira seluk iha baze”. Dehan SEJD Abrão Saldanha ba jornalista sira iha edifisiu SEJD Lecidere, Tersa-Feira, 13/09/2022
Sekretáriu Estadu ne’e akresenta, sira nia pedidu governu aprova ona, federasaun nia kalendariu lolos bainhira mak federasaun halo koordenasaun ho klube no asosiasaun sira hodi halo technical meeting ne’e SEJD hein fali husi parte federasaun nia preparasaun.
Governante ne’e hatutan orsamentu governu aprova ona hein federasaun mak organiza liga hamutuk ho asosiasaun voleibol sira iha Munisipiu no klube sira.
“Orsamentu ami aprova ona hein ita nia federasaun mak organiza hodi realiza liga voleibol hamutuk ho ita nia nia klube no ita federasaun nia asosiasaun munisipiu sira atu nune’e ita nia liga voleibol bele lao iha tinan ne’e ho susesu”. Nia hatete
Reportajen: Augusto dos Santos
Editor: Ekipa Editorial