Selebra Loron Internasionál Juventude, Joven La’os Pertense Ba Problema

SAPNewsTL, Dili: Relasiona ho Loron Internasional Juventude ne’ebe akontese iha loron 12 Fulan Agustu, Sekretáriu Estadu Juventude no Desportu (SEJD) Abrão Saldanha apela ba foinsa’e Timor laran tomak atu atu hatudu ida-idak nia kapasidade no potensia nune’e bele kria solusõens ba problema sira mosu iha sosiedade.

Tuir SEJD Abrão Saldanha hateten Nasoens Unidas hili tema ba loron Internasional Juventude mak Solidariedade Interjerasional no mundu hetan dezafius barak tanba ego de idade.

“Maluk foinsa’e sira, dia 12 de Agostu ne’e loron Internasional ba ita foinsa’e sira, iha selebrasaun loron internasional Juventude ba tinan ida ne’e Nasoens Unidas hili tema hodi dehan solidariedade interjerasional halo mundu ne’e ba idade hotu, ita hatene katak ita nia mundu ne’e kadaves mais hetan dezafius barak tanba ego de idade, joven sira hanoin katak problema bo’ot ne’e, problema bo’ot sira nian no idade bo’ot sira hanoin katak asuntu sira ne’ebé ko’alia ne’e seidauk to’o tempu joven sira nian, entaun iha lakunas bo’ot sira hanesan ne’e mak produs dezafius oioin”. Dehan Sekretáriu Estadu Juventude no Desportu (SEJD) Abrão Saldanha iha Edifisiu SEJD-Lecidere, Kinta-Feira,11/08/2022.

Sekretáriu Estadu ne’e akresenta mundu husu ba ema hotu eksplora ida-idak nia kapasidade atu kontribui ba mundu ida di’ak liu.

“Mundu apela ba ita hotu atu iha solidariedade ida entre jerasaun hotu atu  nune’e bele eksplora ida-idak nia potensia, eksplora ida-idak nia kapasidade hodi kontribui ba mundu ida di’ak liu ba dezenvolvimentu ida sustentavél liu”. Tenik nia

Governante ne’e mos husu ba foinsa’e sira atu hatudu ida-idak nia potensia iha espasu ne’ebé iha hodi bele pertense ba iha solusoens de problema.

“Ba maluk foinsae sira hotu, atu selebra loron Internasional Juventude  ha’u husu atu ita hotu realiza ita ida-idak nia potensia no kapasidade no tenta atu hatudu ita nia kapasidade no potensia sira hotu iha espasu ne’ebé ita iha, iha komunidade ka eskola ka iha fatin ne’ebé ita iha atu  nune’e bele kria solusoens ba problema oioin nebe iha; ho nune’e de’it mak ita sei bele sente hanesan pertense ba solusaun no la’os pertense ba problema. Nia hakotu

 Jornalista   : Aquelina Taec & Juvita dos Santos Sarmento

Editor           : Luis dos Santos