Selebra Loron Mundial Turizmu, Estudante UNTL Krítika Komunidade Soe Fo’er Arbiru
SAPNewsTL, Dili: Estudante Universidade Nasional Timor Lorosae (UNTL) Fakuldade Ekonomia Jestaun, Departamentu Komersiu Turismu ho Eskola Hospitalidade Turismo (EHT) hala’o limpeza jeral hahú husi Ponte Habibi to’o jardim 5 de Maiu.
“Ami nia aktividade ne’e hala’o durante semana ida no iha limpeza jeral ne’e antes atu tama ba eventu loron aban 24 nian, ohin ami hala’o limpeza uluk, aban mak foin halo abertura ba eventu ninian”. Dehan Martino Felis Fernandes Dias ba jornalista sira iha jardim 5 de Maiu, Sesta-Feira, 23/09/2022.
Martino akresenta, liu husi aktividade ne’e bele hafanu mos komunidade sira katak liu husi asaun ne’ebé estudante sira halo, sai hanesan ezemplu ida ba komunidade negosiante sira ne’ebé fa’an iha dalan ninin hodi nune’e soe fo’er iha fatin ne’ebé ita nia estadu kria ona.
“Tanba lixu ne’e nia impaktu barak tebes, kuandu lixu nakonu iha ita nia uma sorin liu-liu iha baleta ku’ak, ne’e nia nia impaktu bele hamosu fali inundasaun, i bele mos hamosu susuk barak no Lori moras dengue mai ita ema”. Tenik nia
Nia hatutan, aktividade ba limpeza ne’e sira hala’o hanesan sira nia materia eventu turismu nian, aliende ida ne’e mos sira halo ida ne’e hodi selebra loron mundial turismu nian iha 27 Setembru tinan ne’e.
estudante ne’e husu ema hotu hodi uza konsiensia evita soe lisxu arbiru tanba fo risku ema nia saude no provoka inundasaun
“Ha’u hakarak hato’o de’it mensanjen ba teritoriu timor laran tomak liu-liu ba iha sidade Díli ninian katak, labele soe foer arbiru tanba lixu ne’e nia impaktu bo’ot tebes, bele hamosu inundasaun wainhira iha tempu udan nian”. Nia informa
Entretantu, estudante ne’e fundamenta nu’udár estudante UNTL husi fakuldade turismu nian, sira nia hanoin liu-liu ba objetu turistiku sira atu nafatin moos, atu nune’e bele atrai turista sira ne’ebé mai vizita Timor
Enkuantu aktividade limpeza jeral ne’e kompostu husi eskola sekundariu EHT Becora hamutuk ho Universidade Nasional Timor Lorosae (UNTL) no sira mos hetan apoiu orsamentu husi Ministériu Turismu Comersiu e Industria (MTCI) ho Bee Lafaek.
Jornalista: Antonio Tilman & Marcella da Costa
Editor: Ekipa Editorial