Selebra Tinan Ba 23 ! Infelizmente, PD Seidauk Realiza Komprimisiu Hotu

SAPNews TL, Dìli- Partidu Demokrátiku(sigla PD), halo nia aniversáriu bá dala-23, iha ambitu ne’e lider masimu Eng.Mariano Assanami Sabino fo nia mensagem bá nia apoiante no povu Timor-Leste katak PD halo komprimisiu kada tinan lima(5) iha palku leten maibe infelizmente seidauk realiza tanba seidauk kaer ukun.

Lider masimu Partidu Demokratiku hateten Povu doben Timor-Leste iha rai laran no rai liur, juventude asuwain ne’ebe luta kontinua nafatin atu bele kontribui economia Timor-Leste nian, ne’ebe servisu iha fatin-fatin, imi iha rai liur maibe imi nia kontribuisaun bo’ot tebes bá Timor-Leste.

Partidu Demokratiku eziste ona 23 anos, inan aman sira hotu hatene katak partidu demokratiku moris iha dia 10 fulan julhu bainhira misaun CNRT remata iha dia 9 de julho, nune’e iha loron 10 de julhu deklara fila-fali partidu demokratiku atu hatutan espiritu funu nain sira, atu instala valores Republika no Demokratika iha ita nia rai, atu bele tane nafatin mehi asuwa’in sira.

“Ohin partidu demokratiku la’o ona 23 anos, povu sei iha nafatin situasaun difisil, ekonomia sei nafatin iha situasaun difisil, ita nia desenvolvimentu sei la’o ho neneik maibe pasu por pasu ita nafatin lao bá oin.Partidu demokratiku dala Barak halo ona komprimisiu ho inan aman sira tinan lima(5), iha palku leten infelizmente partidu demokratiku seidauk kaer ukun tanba ne’e komprimisiu hotu ne’ebe halo tenke respeitu bá maioria ne’ebe mak manan eleisaun”.Dehan lider masimu Eng.Mariano Assanami Sabinu, ne’ebe mak SAPNewsTL asesu liu husi Pagina Facebook PD ba Estadu,Segunda-feira(10/06/2024).

Iha nia memsagen ne’e nia haktuir katak Partidu Demokratiku hakruk ba partidu maioria ne’ebe mak povu fo konfiansa. Maske partidu demokratiku ninia kadeira lá to’o sanulu(10), maibe partidu ne’e ho mai ho visaun estadu nian katak tenke konstrui rai RDTL ne’ebe povu maubere nian

“Povu Timor-Leste maka tenke sentru bá desenvolvimentu ekonomia, infraestrutura, sosial, hodi reforsa instituisaun atu bele servi povu diak liu. Hari’i estadu ida ne’ebe mak fo espasu bá Timor oan hotu-hotu bele servi, harii funsaun publika ida ne’ebe mak iha deit nia funsaun profissional ho ninia pensamentu, fuan ho totalidade atu servi inan aman sira” nia informa

Presidente PD ne’e salienta katak partidu nakloke bá ema hotu-hotu atu bele kurije kritika, maibe nia husu atu kuidadu nafatin partidu ne’e bá povu maubere tomak tanba partidu refere ninia misaun importante maka atu instala nasaun RDTL husi leten to’o iha nia kraik, ninia abut ukun to’o iha kraik tanba partidu demokrátiku defende descentralizasaun.

“Partidu ne’e ninia soberania tenke metin tanba ne’e partidu demokratiku sempre lá iha rejerva atu defende fronteira marítima no terrestre partidu demokratiku mos defende ekonomia. Tanba ne’e inan aman sira, ho 23 anos husu nafatin bá Inan aman sira atu hato’o ninia hanoin, kritika bá partidu demokratiku hodi nune’e partidu demokratiku bele sai partidu ida ne’ebe asuwa’in no forte”.

Iha loron aniversáriu, PD selebra misa agradesimentu no halo komunikadu imprensa hodi fo parabens no mensagem ba militantes no kuadru sira hotu rai-laran no rai-liur.

Jornalista : Marcela Mery da Costa