SLB Garante Jogador Hatudu Jogu Diak, Coração Otimista Hetan Vitoria
Imajen: Treinador AD SLB Laulara Julião Monteiro ho nia asistente treinador sira iha Estadium Munisipal Dili, tersa 21/02/2023
SAPNewsTL, Dili: Klube AD SLB Laulara garante jogador hatudu jogu diak kontra adversariu Atletico Ultramar/Coração FC iha jornada divizaun dahuluk Liga Timorense epoka 2023 maibe Atletico Ultramar/Coração FC otimista hetan vitoria hodi hadau pontu tolu.
“Liga urjente deit sira halo preparasaun mos la masimu ne’ebe atu garante hetan vitoria kontra FC Atletico Ultramar/Coração seidauk hatene tanba ami ekipa adversariu mos mai ho jogador diak hetan ona pontu tolu hakarak manan iha jogu maibe hau nia jogador sira sei hatudu jogu diak kontra adversariu iha loron aban”, dehan treinador AD SLB Laulara Julião Monteiro ba jornalista sira liu husi konferensia imprensa iha Estadium Munisipal Dili, tersa 21/02/2023
Julião hatutan, jogador lokal ho estranjeiru nain tolu mak AD SLB Laulara sei lori hodi kompete iha divizaun dahuluk Liga Timorense epoka 2023 ne’ebe ba jogu aban kontra FC Atletico Ultramar/Coração jogador estranjeiru sei la tun hotu maibe ida deit.
Iha fatin hanesan treinador FC Atletico Ultramar/Coração Januario de Almeida dehan, joga kontra AD SLB Laulara sira preparadu ona no otimista sei hetan vitoria hadau pontu tolu
“Joga kontra AD SLB Laulara ami preparadu ona garante vitoria hodi hetan pontu tolu tanba nu’udar treinador tenki otimista nune’e ne’ebe ha’u prepara ona jogador ho estratejia jogu para hasoru adversariu iha jogu aban nian”, tenik Januario
Januario akresenta, kona formasaun jogador nian labele fo sai iha media maibe aban iha jogu mak haree maibe nia prepara ona jogador sira asegura jogador adversariu nian.
Reportajen: Augusto dos Santos