SLB La Satisfaz Arbitrajen Sira Dirije Jogu Iha Liga Timorense 2023
Imajem Arbitragem hamutuk ho Jogador SLB Laulara no Immanuel FC, iha Estadium Munisipal Dili sabadu, (04/03/2023).
SAPNewsTL, Dili:Klube AD SLB Laulara la satisfaz ba arbitrajen sira ne’ebe dirije sira nia jogu kontra Emmanuel FC iha Liga Timorense epoka 2023 iha loron 4 fulan marsu 2023.
“Ami ladun satisfaz ho arbitrajen dirije ami nia jogu kontra Emmanuel FC tanba iha jogu parte dahuluk ami jogador Zenivio Mota hetan kartaun mean maibe arbitrajen la fo sai tanba sa nia bele hetan kartaun mean depois iha jogu parte daruak nian ami jogador Gumario Morreira hakilar deit hetan tiha kartaun mean ne’e fo terus ba ami nia ekipa”, treinador AD SLB Julião Monteiro ba jornalista sira iha Estadium Munisipal Dili sabadu, (04/03/2023).
Treinador hatutan, sorti fo kartaun mean ba jogador iha jogu parte daruak ne’e iha minutu ikus nian karik arbitrajen fo iha minutu 50 ka 60 sira labele halo buat ida bainhira sira halo protestu parte LFTL husu halo karta depois hatama maibe durante ne’e sira halo karta ne’e seidauk hetan resposta husi parte arbitrajen nian iha Liga Timorense epoka 2023
Julião dehan, sira husu ba arbitrajen sira foti desizaun haree no sukat didiak falta ne’e todan ka lae, selae la fo benefisiu ba ekipa sira iha jogu laran dalaruma estraga tiha jogu ne’e rasik.
Entretantu jogu iha Liga Timorense epoka 2023 tama ona ba jornada datoluk nian maibe klube barak hanesan AD SLB Laulara, Assalam FC no Karketu Dili FC mak durante ne’e la satisfaz ba desizaun arbitrajen sira ne’ebe dirije jogu ne’e rasik tanba la fo desizaun ne’ebe halo klube sira kontente maibe fo terus fali ba klube sira no arbitrajen sira ne’ebe dirije jogu AD SLB Laulara kontra Emmanuel FC mak arbitrajen prinsipal pedro Braga, asitente arbitrajen dahuluk Antonio M. S. De Carvalho, asistente arbitrajen daruak Fernando do Rego, arbitrajen rezerva Pedro Maia Carvalho.
Jogu AD SLB Laulara kontra Emmanuel FC ne’e arbitrajen fo kartaun mean ba jogador AD SLB Zenivio Mota iha minutu 28 no Gumario Morreira iha minutu 90 no fo kartaun kinur ba jogador Emmanuel FC Juvito Moniz iha minutu 2023.
Reportajen: Augusto dos Santos