SLB Manan Academica 2-0, Lidera Provizoriu Tabela Klasifikasaun
Imajen: Jogador Estrela AD SLB Laulara Mouzinho de Lima Lori Bola Hasoru Jogador Defeza Academica FC Iha Estadium Munisipal Dili, tersa (14/03/2023).
SAPNewsTL, Dili: AD SLB Laulara manan Academica FC ho skore 2-0 iha jornada datoluk divizaun dahuluk Liga Timorense epoka 2023 provizoriumente lidera tabela klasifikasaun ho pontu hitu husi jogu dala tolu.
Jogu AD SLB Laulara kontra Academica FC hala’o iha Estadium Munisipal Dili tersa (14/03/2023).
Iha jogu parte dahuluk bainhira kick off ekipa rua ho ambisaun hakarak manan jogu halo jogu tuir ida-idak nian estratejia AD SLB Laulara halo atake liu husi parte avansadu parte los no karuk ba baliza adversariu no Academica FC halo atake makaas husi lina klaran ba baliza maibe iha minutu 6 jogador estranjeiru Michael Hutabarat marka golu halo redi Academica FC nakdoko hatuur kedas skore 1-0.
Skore refere halo ekipa rua aumenta ritmu jogu hodi pasa bola ain ba ain hodi ameansa makaas baliza kada ekipa maibe sira la konsege marka golu to’o jogu parte dahuluk minutu 45 remata skore nafatin 1-0.
Kontinua jogu parte daruak ekipa rua muda estratejia jogu halo nafatin atake ba malu hodi ameansa makaas baliza kada ekipa ne’ebe tama minutu 82 AD SLB Laulara aumenta tan golu ida husi jogador Kornelis Portela muda fali skore ba 2-0, skore refere halo Academica FC esforsu makaas atu responde iha minutu 8 ikus maibe la konsege tanba ekipa adversariu la fo oportunidade ne’ebe minutu 90 remata skore nafatin 2-0 rezulta AD SLB Laulara hetan vitoria no pontu iha jogu kontra Academica FC lidera provizoriumente tabela klasifikasaun divizaun dahuluk Liga Timornse epoka 2023.
Depois jogu remata treinador Academica FC Luisinho dos Santos Saco dehan, sira derrota iha jogu, sira simu maibe husu ba Komisaun organizador sira hadia arbitrajen sira para foti desizaun diak.
“Jogu ohin ami derrota ho SLB hau nafatin fo korajen ba jogador sira hatudu jogu diak nafatin tanba jogu lakon ho manan normal ne’ebe rezultadu ami simu maibe husu komisaun para hare’e arbitrajen sira labele halo sala nune’e hela deit tanba jogador protesta dehan jogador sira mak sala nafatin tenki hadia duni para arbitrajen sira foti desizaun diak” tenik Luisinho
Luisinho hatutan, Jogu tuir mai sira sei nafatin esforsu ohin jogador prinsipal ida hetan kartaun mean fila fali ba treinu tenki hadia no servisu makaas tanba jogu tuir mai hasoru Assalam FC ekipa forsa ida.
Iha sorin seluk treinador AD SLB Laulara Julião Monteiro dehan, sira susesu manan maibe nia la satisfaz ho jogador sira tanba la hatudu tuir instrusaun ne’ebe treinador fo.
“Jogu ami susesu manan duni maibe hau ladun satisfaz ba hau jogador sira tanba instrusaun ami fo sira la hatudu iha kampu iha jogu parte dahuluk minutu 20 sae ne’e no jogu parte daruak minutu dahuluk ne’e, ami hadia instrusaun ba jogador sira karik jogador sira ladun komprende sira sei halo para komprende hatudu iha jogu tuir mai”, Julião hateten
Entretantu iha jogu AD SLB Laulara halo substituisaun ba jogador nain Haat no jogador nain haat hetan kartaun kinur, Academica FC troka jogador nain rua, jogador Academica FC nain ida hetan kartaun kinur no ida fali hetan kartaun kinur rua sai mean, rezultadu jogu ne’e halo AD SLB Laulara lidera provizoriumente tabela klasifikasaun divizaun dahuluk Liga Timorense epoka 2023 iha jornada datoluk ho pontu hitu husi jogu manan dala rua ho impata ida no Academica FC mantein nafatin pontu 4 husi jogu manan ida, impata ida ho lakon rua.
Reportajen: Augusto dos Santos