Taça Esperansa 2023, Eskola Sekundária Cristal Sai Kampiaun
SAPNewsTL, Dili: Eskola Sekundaria Privadu Cristal sai kampiaun iha Taça Esperança 2023, hafoin halakon nia adversariu Eskola Sekundaria Jeral Nicolao Lobato liu husi suta penalidade.
Jogu Eskola Sekundaria Nicolau Lobato kontra Eskola Sekundaria Cristal ne’e realiza iha Estadium Munisipal Dili, domingu Loraik (01/05/2023).
Bainhira jogu kick off ekipa rua halo kedas jogu hodi lansa kontra atake ba mai, nune’e iha minutu 10, jogador Anjo Soares, marka kedas golu halo rede Eskola sekundaria Cristal nia nakdoko hodi muda skore ba 1-0.
Jogador sira husi Eskola Sekundaria Cristal ne’e halo esforsu hodi resposta hikas golu ba adversariu , maibe la rezulta golu ruma to’o oras jogu parte dahuluk remata Eskola Sekundaria Nicolau Lobato lidera ho skore 1-0.
Kontinua ba jogu parte daruak nian jogador Eskola Sekundaria Cristal ne’ebe halo hikas mundansa ba sira, ekipa hodi fo presaun makaas ba Eskola Sekundaria Nicolao Lobato, tanba ne’e iha minutu 59, jogador Alexander Guterres marka kedas golu halo ekipa adversariu nia redi nakdoko hodi muda skore 1-1
Ho skore impata ekipa rua hasae nia ritmu jogu atu marka tan golu para ida sai vitoria iha minutu 90 nia laran maibe ekipa rua la konsege aumenta golu nune’e to’o minutu 90 remata skore mantein impata 1-1.
Skore impata 1-1, jogu ekipa rua hakat direita ba suta penalidade nune’e jogador husi Eskola Sekundaria Cristal suta penalidade ho diak no jogador husi Eskola Sekundaria Nicolao Lobato faila iha suta penalidade ikus mai vitoria ba Eskola Sekundaria Cristal hodi sai kampiaun ba Taça Esperansa 2023.
Enkuantu, jogu refere partisipa husi masimu husi adeptus husi eskola 2 nian, Lideransa Nasional Atual Primeiru Ministru Kay Rala Xanana Gusmão no mos patrosinador ba Taxa Esperansa nian.
Hafoin jogu termina prezidente ezekutivu Instituisaun Edukativa Cristal-Fundasaun Cristal, Agustinho dos Santos Gonçalves hatete, sira fo agradese ba fundador Taça Esperansa 2023 iha inisiativa diak hodi realiza jogu ne’e.
“Ami agradese ba fundador Taça Esperança 2023 Nilton Gusmão iha inisiativa hodi organiza jogu ne’e hodi envolve estudante sira husi ensinu Sekundaria sira iha sidade Dili”, Agostinho hateten
Iha sorin seluk, Treinador Eskola Sekundaria Nicolao Lobato, Atanasio Pinto dehan, sira orgullu tanba bele sai nu’udar manan daruak iha Taça Esperança ne’e rasik no husu komisaun organizador atu realiza tan iha tinan oin.
“Ami Orgullu tanba bele sai manan nain daruak no ami husi ba parte komisaun organizadora atu kontinua realiza kompetisaun ne’e iha tinan oin, atu nune’e bele promove jogador sira iha nivel sekundaria”, tenik nia
Entretantu,manan nain sira iha Taça Esperança 2023 maka kampiaun Eskola Sekundaria Cristal simu premiu medalla, tasa ida ho orsamentu montante 2,000 USD, manan nain daruak Eskola Sekundaria Nicolao Lobato simu medalla ho orsamentu montante 1,500 USD, manan datoluk Eskola Sekundaria Colégio Paulo VI simu medalla ho orsamentu montante 1000 USD, manan nain dahaat Eskola Sekundaria 12 Novembru simu orsamentu montante 500 USD.
