Husi Desportu Halibur Estudante, Xanana Hakarak Desvia Dalan Aat Husi Arte Marsial

SAPNewsTL, Dili: Primeiru Ministru José Alexandre Kayrala Xanana Gusmão louva Komisaun Organizador (KO) Taça Esperança 2023 tanba halibur estudante sira husi futebol, Líder Nasionàl Xanana Gusmão saran lia hirak ne’e wainhira partisipa iha jogu final Eskola Sekundaria Cristal kontra Eskola Sekundaria Nicolau Lobato iha Estadium Munisipal Dili.

“Ita fo esperansa boot ba maun Nilton Gusmão iha inisiativa boot diak teb-tebes kona-ba desportu, liu-liu desportu ida ne’ebé hare’e ba eskola sekundariu sira. Nune’e halibur estudante sira husi eskola 16 mak mai joga iha Taça Esperança 2023 hodi buka manan”,

“Ne’e duni ha’u louva teb-tebes imi sira iha Taça Esperança 2023 liuliu komisaun organizador tan ne’e hau husu boot tinan seluk repete tan, fo oportunidade ba feto mane partisipa hotu”, Dehan primeiru ministru José Alexandre Kayrala Xanana Gusmão ba jornalista liu husi diskursu iha stadium munisipal Dili, Domingo (1/10/2023)

Xanana hatutan, jogu ne’e ida diak teb-tebes tanba eskola sira lakon mos sira la tuku malu no la hirus malu kria ambiente amizade ho Fraternidade iha sira nia leet, ida ne’e mak diak teb-tebes hodi nune’e iha futuru mos lori nafatin oportunidade ida ne’e iha desportu hodi desvia tiha dalan at hosi arte marsial.

Nia afirma tan, nia mos hato’o parabens ba ekipa rua husi Eskola Sekundaria Cristal ho Eskola Sekundaria Nicolau Lobato joga ho diak tanba desportu manan ka lakon hanesan deit
“Ne’e duni imi manan ka lakon ne’e desportu ba imi ida idak nian, manan diak liu ha’u lakoi hare’e imi ne’ebe lakon karik komesa tebe malu no tuku malu,” tenik Xanana

Enkuantu, Iha Jogu Taça Esperansa 2023 ne’e Eskola Sekundáriu Privadu Cristal sai kampionatu no Eskola Sekundáriu Nicolau Lobato okupa segundu lugar