Tara An Iha Sela Laran, FONGTIL Husu PM Demiti Komandante PNTL Munisipiu Dili
SAPNewsTL, Dili : Relasiona ho sidadaun José Bernardo ne’ebe tara an iha Sela Detensaun Komandu PNTL Kaikoli Dili, Forum ONG Timor-Leste (FONGTIL) liu husi Komunikadu Imprensa husu ba Primeiru Ministru no Ministru Interior, atu demiti Komandante PNTL Munisipiu Dili.
“Organizasaun sosiedade sivil lamenta ho José Bernardo ne’ebe mate iha sela detensaun komandu PNTL Munisipiu Dili, husu Primeiru Ministru no Ministru Interior (Taur Matan Ruak) atu demiti Komandante PNTL Munisipiu Dili no halo suspende ba prosesu investigasaun”. Dehan Porta Voz Jorge Madeira ba Jornalista sira iha salaun FONGTIL,Sexta-feira, (02/09/2022)
Entretantu, FONGTIL mos husu ba Ministériu Públiku hodi delega kompeténsia ba PCIC hodi bele halo investigasaun, tanba saida Matebian hakotu i’is la uja uniforme detensaun nian.
Entretantu, Diretor ezekutivu Asian Justice And Rihts (AJAR) Jose Luis de Oliveira hateten kazu ne’e tenke halo investigasaun klean no suspende polísia hotu hodi submete ba investigasaun
“Ita tenke konfia autoridade kompetente mak polisia so ke ita deskonfia polisia iha laran tanba akontesimentu ne’e iha sela laran, polisia sira hotu ne’ebe mak iha kuartel laran tenke suspende hotu no loke investigasaun ba sira, nusá mak tali ne’e iha laran tanba ne’e mak ha’u dehan ita tenke deskonfia nafatin polisia”. nia tenik
Enkuantu, Matebian submete ona ba prosesu autopsia, no investigasaun, tuir informasaun ne’ebe Jornalista SAPNewsTL asesu katak hafoin de prosesu investigasaun sei anunsia ba publiku iha tempu badak
Jornalista : Marcela da Costa
Editor : Luis Pailofo