Uniku Golu Husi João Halle Lori Ponta Leste Manan Coração 1-0
Imajen: Jogador AS Ponta Leste Nain Rua Duni Jogador Atletico Ultramar/Coração FC Lori Bola Iha Estadium Munisipal Dili Sabadu, (25/03/2023).
SAPNewsTL, Dili: AS Ponta Leste FC manan Atletico Ultramar/Coração FC ho skore 1-0 iha jornada dalimak divizaun dahuluk Liga Timorense epoka 2023 husi uniku golu João Halle iha minutu 45.
Jogu AS Ponta Leste kontra Atletico Ultramar/Coração FC hala’o iha Estadium Munisipal Dili sabadu 25/03/2023.
Iha jogu parte dahuluk bainhira kick off jogador husi ekipa rua muda bola ain ba ain hodi halo presaun no atake ba malu nune’e jogador sira hetan oportunidade ameansa baliza kada ekipa nian, ekipa Atletico Ultramar/Coração FC konsege hetan suta penalidade tanba bola kona liman jogador AS Ponta Leste iha area penalidade laran maibe jogador kapitaun Atletico Ultramar/Coração FC Carlos Ximenes la konsege halo golu ne’ebe tama ba minutu 45 jogador João Halle husi AS Ponta Leste marka golu halo ekipa adversariu nia redi nakdoko hatuur kedas skore ba 1-0 nune’e AS Ponta Leste lidera minutu 45 jogu parte dahuluk ho skore 1-0.
Kontinua ba jogu parte daruak nian ekipa rua muda estratejia jogu nian, sofre golu ida halo ekipa Atletico Ultramar/Coração FC hasa’e sira nia ritmu jogu hodi halo presaun makaas ba ekipa AS Ponta Leste nune’e sira hetan oportunidade ameansa baliza adversariu maibe la konsege marka golu.
Enkuantu jogador sira husi AS Ponta Leste halo kontra atake makaas ba adversariu hetan mos oportunidade ameansa baliza Atletico Ultramar/Coração FC maibe la konsege uza oportunidade ne’e hodi marka golu tan ne’e jogu minutu 90 remata skore nafatin 1-0 ne’ebe golu uniku husi jogador AS Ponta Leste João Halle halo klube ne’e manan adversariu ho skore 1-0 hodi hetan pontu tolu.
Depois jogu remata asistente treinador Atletico Ultramar/Coração FC Chiquito Do Carmo hatete, ohin sira derrota tanba jogador sira la hatudu jogu diak no aproveita oportunidade suta penalidade.
“Ohin ami derrota ba dalarua ami sente todan ba ami atu hakat ba oin tanba ohin hau nia jogador sira nia mentalidade mos la masimu tanba suta penalidade ne’ebe fo vantajen ba ami maibe hau nia jogador la aproveita no hau nia jogador avansadu sira la hatudu jogu masimu”, tenik Chiquito
Chiquito hatutan, jogu tuir sira sei hadia lina avansadu sira ne’ebe ohin sira la hatudu jogu diak tanba sira lakoi tama ba zona degradasaun.
Iha sorin seluk treinador AS Ponta Leste Edi Fernandes dehan, vitoria ohin ne’e hadok ona sira husi zona degradasaun no iha fali ona oportunidade atu sai kampiaun.
“Vitoria ohin ne’e hadok an ami iha zona degradasaun nian tanba ami husi pozisaun daualu nian hakat ba dahaat ho pontu 7 tan ne’e ami mos iha fali ona oportunidade atu sai kampiaun tanba klube sira pozisaun liu ami nia pontu la dook husi ami”, Edi hateten
Edi akresenta, jogu ohin iha parte dahuluk sira joga lentu oituan maibe tama ba parte daruak sira muda estratejia neneik to’o hetan sira nia ritmu jogu no jogu tuir mai sira sei hadia diak liu tan kolaborasaun jogador sira husi lina ba lina.
Entretantu iha jogu ohin AS Ponta Leste halo substituisaun ba jogador nain lima no Atletico Ultramar/Coração FC troka jogador nain tolu, jogador nain rua, Lesi Careca Atok ho Miguel Barbosa husi Atletico Ultramar/Coração FC hetan kartaun kinur no vitoria ohin ne’e halo AS Ponta Leste provizoriu okupa pozisaun dahaat iha tabela klasifikasaun divizaun dahuluk Liga Timorense epoka 2023 ho pontu 7 husi jogu dalimak manan dala rua, impata ida ho lakon rua no derrota ne’e halo Atletico Ultramar/Coração FC provizoriu okupa pozisaun daualu ho pontu 4 husi manan ida, impata ida no lakon rua.
Reportajen: Augusto dos Santos