Uniku Golu Luis Figo Lori Santa Cruz Manan Mihis Kablaki 1-0

SAPNewsTL, Dili: Santa Cruz FC hetan pontu tolu tanba golu uniku husi Luis Figo lori sira manan mihis Kablaki FC ho skore 1-0 iha jornada datoluk divizaun daruak Liga Timorense epoka 2023.

Jogu Kablaki FC kontra Santa Cruz FC hala’o iha Estadium Munisipal Dili sesta 17/03/2023.

Iha jogu parte dahuluk bainhira kick off jogu husi ekipa lao diak tebes tanba Santa Cruz FC ho ambisaun hakarak manan jogu tanba lakon ona dala rua no Kablaki FC ne’ebe lakon dala ida no manan ida mos hakarak manan jogu para atu aumenta sira nia pontu tan ne’e ekipa hatudu jogu tuir ida-idak nia estratejia hodi halo presaun no atake ba malu, ekipa rua hetan oportunidade ameansa baliza kada ekipa nian maibe sira la konsege marka golu ida to’o jogu parte dahuluk minutu 45 remata skore nafatin okulista 0-0.

Kontinua ba jogu parte daruak nian ekipa muda estratejia no halo mudansa hodi halo substituisaun ba jogador ne’ebe Kablaki FC troka jogador iha lina klaran no avansadu nian no Santa Cruz FC mos troka jogador iha lina klaran no avansadu tanba ekipa rua hakarak manan jogu, sira halo nafatin halo presaun no atake ba malu hodi ameansa baliza kada ekipa nian.

Ekipa rua halo jogu nafatin muda bola ain ba ain hodi hetan oportunidade ameansa baliza kada ekipa nian ne’ebe tama minutu 79 jogador Santa Cruz FC Luis Figo marka golu halo redi adversariu nakdoko hatuur kedas skore ba 1-0.

Skore 1-0 halo ekipa rua aumenta ritmu jogu nian hodi hasa’e sira nia presaun no atake ba malu atu aumenta golu maibe la jogador ida husi ekipa rua marka golu tan to’o jogu parte daruak minutu 90 remata skore nafatin 1-0 rezulta Santa Cruz FC manan mihis Kablaki FC ho skore 1-0 no hetan pontu iha jornada datoluk divizaun daruak Liga Timorense epoka ne’e.

Depois jogu remata treinador Kablaki Carlos Vilar hatete, hau triste tanba jogador sira la hatudu jogu hanesan antes tan ne’e sira derrota maibe futebol lao hanesan ne’e

“Ohin ami derrota tanba hau nia ekipa la hatudu jogu hanesan antes ne’e, impaktu dalaruma kampu tanba jogu lao dalabarak ona iha kampu ne’e ne’ebe duut kampu mos la ajuda jogador sira hatudu jogu nune’e hau triste maibe futebol lao hanesan ne’e”, tenik Carlos

Iha sorin seluk asistente treinador Santa Cruz Arsenio Afonso dehan, sira fo parabens ba jogador sira ne’ebe esforsu ona manan jogu hodi hetan pontu tolu no sira sei hadia tan sira nia jogu ba jogu tuir mai.

“Ohin ekipa rua hatudu jogu diak halo presaun ba malu atu marka golu maibe sorte monu ba ami hodi hetan pontu tolu ne’ebe ami fo parabens ba jogador sira hotu ne’ebe esforsu ona ohin ami manan jogu ne’e no ami sei hadia jogu ohin nian ba jogu tuir mai”, Arsenio hateten

Entretantu iha jogu refere Santa Cruz FC halo substituisaun ba jogador nain haat no Kablaki FC mos troka jogador nain haat no ohin ekipa rua hatudu jogu dixiplina tebes tanba la iha jogador ida hetan kartaun ruma.

Reportajen: Augusto dos Santos